എരുമപ്പെട്ടി: എരുമപ്പെട്ടി കരിയന്നൂരില്‍ റോഡരികില്‍ പാര്‍ക്ക് ചെയ്യുന്ന സിമന്റ് ലോറികള്‍ വഴിയാത്രക്കാര്‍ക്ക് അപകട ഭീഷണി ഉയര്‍ത്തുന്നു. കരിയന്നൂരില്‍ പ്രവൃത്തിക്കുന്ന സിമന്റ് ഗോഡൗണിലേക്ക് ലോഡിറക്കാന്‍ വരുന്ന ലോറികളാണ് റോഡരികില്‍ നിര്‍ത്തിയിടുന്നത്.
അന്യസംസ്ഥാനങ്ങളില്‍ നിന്നും സിമന്റുമായി വരുന്ന വലിയ ലോറികള്‍ ലോഡിറക്കാനുള്ള ഊഴവും കാത്ത് ദിവസങ്ങളോളം റോഡരികില്‍ നിര്‍ത്തിയിടുക പതിവാണ്. കുന്നംകുളം-വടക്കാഞ്ചേരി പ്രധാന പാതയായ ഈ റോഡിലെ വീതികുറഞ്ഞ ഭാഗത്താണ് ലോറികള്‍ നിര്‍ത്തിയിടുന്നത്.
അതിനാല്‍ കാല്‍നട യാത്രക്കാര്‍ക്ക് റോഡിലൂടെ നടക്കേണ്ട അവസ്ഥയാണ്. റോഡിലൂടെ സഞ്ചരിക്കുന്ന വാഹനങ്ങള്‍ ഗോഡൗണിനു മുന്നിലുള്ള വലിയ കുഴികളില്‍ ചാടുന്നത് ഒഴിവാക്കുന്നതിനു  വെട്ടിച്ചെടുക്കുന്നതു മൂലം വഴിയാത്രക്കാരെ തട്ടി അപകടങ്ങള്‍ ഉണ്ടാകുന്നതും പതിവാണ്.
 എരുമപ്പെട്ടി സര്‍ക്കാര്‍ ആശുപത്രി, സബ് രജിസ്ട്രാര്‍ ഓഫിസ്, പെട്രോള്‍ പമ്പ് എന്നിവക്ക് സമീപത്താണ് ലോറികള്‍ നിര്‍ത്തിയിടുന്നത്.
ദിവസവും നൂറുകണക്കിന് ആളുകളാണ് ഇവിടങ്ങളിലേക്ക് കാല്‍ നടയായും മറ്റു വാഹനങ്ങളിലുമായും വന്നു പോകുന്നത്. വഴിയാത്രക്കാരെ ബുദ്ധിമുട്ടിക്കുന്ന സിമന്റ് ഗോഡൗണുകാരുടെ നടപടിയില്‍ പ്രതിഷേധിച്ച് നാട്ടുകാര്‍ പ്രക്ഷോഭത്തിനൊരുങ്ങുകയാണ്.