ചങ്ങരംകുളം: ശരീരം മുഴുവന്‍ പരുക്കേറ്റ നിലയില്‍ ബൈക്ക് ഓടിച്ച് ചങ്ങരംകുളത്ത് എത്തിയ യുവാവിനെ നാട്ടുകാര്‍ തടഞ്ഞ് വച്ച് പൊലിസില്‍ ഏല്‍പിച്ചു. കഴിഞ്ഞ ദിവസം ചങ്ങരംകുളം ഹൈവേ ജങ്ഷനില്‍ ആയിരുന്നു സംഭവം.
ബൈക്കുമായി നിയന്ത്രണമില്ലാതെ വന്ന് റോഡരികിലെ കച്ചവടക്കാരന്റെ മുകളിലേക്ക് മറിഞ്ഞതോടെ നാട്ടുകാര്‍ എഴുന്നേല്‍പിച്ച് നിര്‍ത്തി. എന്നാല്‍ ശരീരമാസകലം മുറിവുകള്‍ കണ്ട് നാട്ടുകാര്‍ ചോദ്യം ചെയ്തപ്പോള്‍ അതിവേഗം വീണ്ടും ബൈക്കെടുത്ത് പോവാന്‍ ശ്രമം നടത്തുകയായിരുന്നു. യുവാവിന്റെ യാത്ര അപകടാവസ്ഥയിലാണെന്നറിഞ്ഞതോടെ നാട്ടുകാര്‍ പുറകെയെത്തി ബൈക്ക് തടഞ്ഞുവയ്ക്കുകയുമായിരുന്നു. പരസ്പര വിരുദ്ധമായ മറുപടി ലഭിച്ചതോടെ മദ്യലഹരിയിലാണെന്നും നാട്ടുകാര്‍ സംശയിച്ചു.
തുടര്‍ന്ന് പൊലിസിനെ വിവരമറിയിക്കുകയും ചങ്ങരംകുളം പൊലിസെത്തി സ്റ്റേഷനിലെത്തിച്ച് ബന്ധുക്കളെ വിളിച്ച് വരുത്തിയപ്പോഴാണ് മാനസിക നില തെറ്റിയ തിരൂരര്‍ മംഗലം സ്വദേശിയാണെന്നും ബൈക്കില്‍ ഗുളിക വാങ്ങിക്കാന്‍ ചങ്ങരംകുളത്ത് എത്തിയതെന്ന് മനസിലായത്.
ഹെല്‍മറ്റ് ധരിച്ചുള്ള യാത്രയില്‍ പല സ്ഥലങ്ങളില്‍ വീണ് ശരീരം മുഴുവന്‍  പരുക്കേറ്റ നിലയില്‍ ആയിരുന്നു ഇദ്ധേഹം ചങ്ങരംകുളത്തെത്തിയത്. പൊലിസ് ബന്ധുക്കളോടൊപ്പം ഇവരെ പറഞ്ഞു വിടുകയായിരുന്നു.