തിരുന്നാവായ (മലപ്പുറം): കേരളത്തിൽ തൊഴിലില്ലായ്മ വർധിച്ചതായി കേന്ദ്ര സ്റ്റാറ്റിസ്റ്റിക്കൽ  മന്ത്രാലയത്തിന്റെ പഠനം. കേരളത്തിലെ തൊഴിലില്ലായ്മ ഏപ്രിൽ-ജൂൺ കാലയളവിൽ10 ശതമാനമായിരുന്നത് ഇപ്പോൾ 10. 1 ആയി വർധിച്ചു. രാജ്യത്ത് തൊഴിലില്ലായ്മാ നിരക്ക് ഏറ്റവും കൂടുതൽ ജമ്മു കശ്മ‌ിരിലാണ് (11.8 ശതമാനം). രണ്ടാമത് ഒഡിഷയും (10.6 ശതമാനം), മുന്നാമത് ബിഹാറും (7.4 ശതമാനം) നാലാമത് കേരളവുമാണ്.

രാജ്യത്ത് വനിതകളുടെ തൊഴിൽ പ്രാതിനിധ്യം വർധിച്ചതായും പഠനത്തിൽ പറയുന്നു. 2017-18ൽ  22 ശതമാനം വനിതകളാണു തൊഴിലെടുത്തിരുന്നതെങ്കിൽ  2023-24 ൽ 40.3 ശതമാനമായി വർധിച്ചതായാണ് കണ്ടെത്തൽ.  ആകെ തൊഴിലാളികളിൽ വനിതകളുടെ പ്രാതിനിധ്യം 23.3 ശതമാനത്തിൽനിന്ന് 41.7 ആയി ഉയർന്നിട്ടുണ്ട്. വനിതകളുടെ തൊഴിലില്ലായ്‌മ 5.6 ശതമാനത്തിൽ നിന്ന് 3.2 ശതമാനമായി കുറഞ്ഞു.

ബിരുദാനന്തര ബിരുദമുള്ള വനിതകളിൽ 39.6 ശതമാനം പേർ ജോലി ചെയ്യുന്നുണ്ട്. ആറുവർഷം മുമ്പ് ഇത് 34.5 ശതമാനമായിരുന്നു.
ഹയർസെക്കൻഡറി വിദ്യാഭ്യാസമുള്ള വനിതകളിൽ ജോലി ചെയ്‌തിരുന്നവർ 11.4 ശതമാനമായിരുന്നത് 23.9 ശതമാനമായി വർധിച്ചിട്ടുണ്ട് . പ്രൈമറി വിദ്യാഭ്യാസമുള്ളവരിൽ ജോലി ചെയ്യുന്നവർ 24.19 ശതമാനത്തിൽ നിന്ന് 50.2 ശതമാനമായും വർധിച്ചു. ജനസംഖ്യയുടെ 58.2 ശതമാനം പേർ ഇന്ത്യയിൽ ജോലി ചെയ്യുന്നുണ്ടെന്നാണ് പഠനത്തിൽ പറയുന്നത്. ആറ് വർഷം മുമ്പ് ഇത് 46.8 ശതമാനമായിരുന്നു.