തിരുവനന്തപുരം: 2018 ഓഗസ്റ്റിലെ മഹാ പ്രളയത്തില്‍ എല്ലാം നഷ്ടപ്പെട്ടവര്‍ക്ക് സഹായം നല്‍കാന്‍ മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് കിട്ടിയ തുകയില്‍ വര്‍ഷം ഒന്നര കഴിഞ്ഞിട്ടും ചെലവാക്കിയതാകട്ടെ കഴിഞ്ഞ ഒക്‌ടോബര്‍ 29 വരെ 2,476.46 കോടി രൂപ മാത്രം.
പ്രളയത്തില്‍പ്പെട്ടവര്‍ക്ക് ആശ്വാസ ധനസഹായമായി 457.58 കോടിയും വീടും സ്ഥലവും നാശനഷ്ടം സംഭവിച്ചവര്‍ക്ക് 1,834.92 കോടിയും ചികിത്സാ ധനസഹായമായി 12.30 ലക്ഷവും കെയര്‍ ഹോം പദ്ധതിയ്ക്കായി സഹകരണ വകുപ്പിന് നല്‍കിയത് 52.69 കോടിയും കര്‍ഷകര്‍ക്ക് നല്‍കിയ സഹായം 54 കോടിയും ഉപജീവന കിറ്റ് വിതരണത്തിനായി സിവില്‍ സപ്ലൈസിന് നല്‍കിയത് 54.46 കോടിയും നല്‍കി.പട്ടികജാതി, പട്ടിക വര്‍ഗ വികസന കോര്‍പറേഷന് നല്‍കിയത് 1.91 ലക്ഷവും മരണപ്പെട്ടവരുടെ ആശ്രിതര്‍ക്ക് 29 ലക്ഷവും ഭൂമി നഷ്ടപ്പെട്ടവര്‍ക്ക് 62.34 ലക്ഷവും വീട് നിര്‍മാണ സ്ഥല സജ്ജീകരണത്തിനായി 25.82 ലക്ഷവും പെന്‍ഡിങ് അപ്പീലുകള്‍ പരിഹരിക്കുന്നതിന് എന്‍ജീനിയര്‍മാര്‍ക്ക് നല്‍കിയതില്‍ 12.18 ലക്ഷവും നല്‍കി. അധിക റേഷന്‍ വിതരണം നല്‍കിയ ഇനത്തില്‍ സിവില്‍ സപ്ലൈസ് കോര്‍പറേഷന് നല്‍കിയത് 9.4 കോടിയാണ്. സാമൂഹ്യമായി പിന്നാക്കം നില്‍ക്കുന്നവര്‍ക്കായുള്ള പ്രത്യുത്ഥാനം പദ്ധതിയ്ക്കായി 10 കോടി, സി ആപ്റ്റിന് 47.46 ലക്ഷം, ചെറുകിട സംരഭര്‍ക്കുള്ള ഉജ്ജീവന വായ്പ പദ്ധതി പ്രകാരം 1.50 കോടി രൂപയുമാണ് പ്രളയത്തില്‍ പിരിഞ്ഞു കിട്ടിയതില്‍നിന്ന് ഇതുവരെ നല്‍കിയത്.