മുംബൈ: ഐ.എസ്.എല്ലില്‍ ഇന്നലെ നടന്ന മുംബൈ സിറ്റി-എ.ടി.കെ മത്സരം സമനിലയില്‍ കലാശിച്ചു. മുംബൈയുടെ ഹോം ഗ്രൗണ്ടില്‍ നടന്ന മത്സരത്തില്‍ മുംബൈ എ.ടി.കെയുടെ ഗോള്‍മുഖത്ത് അക്രമം വിതച്ചെങ്കിലും പന്ത് ലക്ഷ്യത്തിലെത്തിക്കാനായില്ല. കൗണ്ടര്‍ അറ്റാക്കുകളുമായി എ.ടി.കെയും കളംനിറഞ്ഞ് കളിച്ചതോടെ തീ പാറിയ പോരാട്ടമായി. പലപ്പോഴും ഇരു ടീമുകളിലെയും താരങ്ങള്‍ പരുക്കന്‍ കളി പുറത്തെടുത്തു. ഇതിനെ തുടര്‍ന്ന് റഫറിക്ക് മൂന്ന് തവണ മഞ്ഞക്കാര്‍ഡ് പുറത്തെടുക്കേണ്ടി വന്നു.
എട്ട് മത്സരങ്ങളില്‍നിന്ന് 14 പോയിന്റുമായി മുംബൈ നാലാം സ്ഥാനത്ത് നില്‍ക്കുന്നു. ആറാം സ്ഥാനത്തുള്ള എ.ടി.കെക്ക് എട്ട് മത്സരങ്ങളില്‍നിന്ന് 11 പോയിന്റാണുള്ളത്. ഇന്ന് നടക്കുന്ന മത്സരത്തില്‍ ജംഷഡ്പുര്‍ ചെന്നൈയിന്‍ എഫ്.സിയെ നേരിടും.