കണ്ണൂര്‍: കൗമാര ശാസ്ത്ര പ്രതിഭകള്‍ വിസ്മയച്ചെപ്പ് തുറന്ന സംസ്ഥാന സ്‌കൂള്‍ ശാസ്‌ത്രോത്സവത്തിന് കണ്ണൂരില്‍ പരിസമാപ്തി. ശാസ്ത്രം, ഗണിത ശാസ്ത്രം, സാമൂഹ്യ ശാസ്ത്രം, പ്രവൃത്തി പരിചയം, ഐ.ടി വിഭാഗങ്ങളിലാണ് മൂന്നു ദിവസങ്ങളിലായി മത്സരങ്ങള്‍ നടന്നത്. കഴിഞ്ഞവര്‍ഷത്തെ പോലെ ജില്ലകള്‍ തമ്മിലുള്ള മത്സരങ്ങള്‍ ഇത്തവണ ഉണ്ടായിരുന്നില്ല. വിജയികളായ വിദ്യാര്‍ഥികള്‍ക്ക് ട്രോഫിയും നല്‍കിയില്ല. അയ്യായിരത്തില്‍പ്പരം മത്സരാര്‍ഥികള്‍ മേളയുടെ ഭാഗമായി. സ്‌പെഷല്‍ സ്‌കൂള്‍ വിദ്യാര്‍ഥികളുടെ പ്രതിഭ തെളിയിക്കുന്ന പ്രകടനമായിരുന്നു. ശാരീരിക വെല്ലുവിളികള്‍ അതിജീവിച്ചാണു സ്‌പോട്ട് മെയ്ക്കിങ് ഐറ്റം പൂര്‍ത്തിയാക്കിയത്. പൂര്‍ണമായി കാഴ്ച നഷ്ടപ്പെട്ട മത്സരാര്‍ഥിയും മുള ഉപയോഗിച്ചുള്ള കൂട്ടമെടയലില്‍ പങ്കെടുത്തു. ഹൈസ്‌കൂള്‍, ഹയര്‍സെക്കന്‍ഡറി, വൊക്കേഷനല്‍ ഹയര്‍സെക്കന്‍ഡറി വിഭാഗങ്ങള്‍ക്കായി 173 മത്സര ഇനങ്ങളിലായിരുന്നു മത്സരം.