ന്യൂഡല്‍ഹി: ബാബരി ഭൂമിതര്‍ക്ക കേസില്‍ സുപ്രിം കോടതിയില്‍നിന്നും നീതി ലഭിച്ചില്ലെന്നും എന്നാല്‍, വിധി മാനിക്കുകയാണൈന്നും വഖഫ് ബോര്‍ഡിനുവേണ്ടി സുപ്രിംകോടതിയില്‍ ഹാജരായ സഫരിയാബ് ജീലാനി. മസ്ജിദ് ഒരിക്കല്‍ നിര്‍മിച്ചുകഴിഞ്ഞാല്‍ പിന്നെ അത് അല്ലാഹുവിന്റേതാണ്. രാമന്റെ പേരില്‍ പള്ളിയെടുത്താലും അത് അല്ലാഹുവിന്റേതാകും. ശരീഅത്ത് പ്രകാരം പള്ളി കൈമാറ്റം ചെയ്യാനോ വില്‍ക്കാനോ കഴിയില്ല. പള്ളിക്ക് പകരമായി മറ്റൊന്നുമില്ല. മസ്ജിദേ ജന്മസ്ഥാന്‍ എന്ന് ഈ പള്ളിക്കും പറഞ്ഞിരുന്നു. ആരാധന നടന്നിരുന്ന പള്ളി മറ്റൊരു വിഭാഗത്തിന് കൈമാറുന്നത് നീതിയല്ല. എന്നാല്‍, കോടതിയുടെ വിധി അംഗീകരിക്കുന്നു-അദ്ദേഹം പറഞ്ഞു. പുനഃപരിശോധന ഹരജി നല്‍കുന്നത് ബോര്‍ഡ് എക്‌സിക്യൂട്ടിവ് യോഗം ചേര്‍ന്ന് തീരുമാനിക്കും.

കോടതിയുടെ കണ്ടെത്തല്‍ നീതിയാണെന്ന് കരുതുന്നില്ല. ഒരേ തെളിവ് മസ്ജിദിന് എതിരും ക്ഷേത്രത്തിന് അനുകൂലവുമായിട്ടാണ് കോടതി കണ്ടത്. തര്‍ക്കഭൂമിയില്‍ ഹിന്ദു ആരാധനകള്‍ നടത്തി എന്നു കണ്ടെത്താന്‍ കോടതി ആശ്രയിച്ച രേഖകളില്‍ തന്നെ അവിടെ നമസ്‌കാരം നടന്നിരുന്നു എന്നതിനു തെളിവുകളുണ്ട്. നമസ്‌കാരം നടന്നതടക്കമുള്ള നടുമുറ്റവും മറുപക്ഷത്തിന് നല്‍കിയതിനെ നീതി എന്നു വിളിക്കാന്‍ കഴിയില്ല. അവിടെ പള്ളിയായിരുന്നു എന്നതിന് മറുഭാഗം ഹാജരാക്കിയ രേഖകളില്‍ തന്നെ തെളിവുണ്ടെന്നും അദ്ദേഹം പറഞ്ഞു.
ബാബറിന്റെ മേല്‍ ഞങ്ങള്‍ക്ക് ഒരു അവകാശവാദവുമില്ല. ബാബറിനോട് എന്തെങ്കിലും വിരോധമുണ്ടെന്ന് കരുതി മസ്ജിദിനോട് അത് പാടില്ലെന്നും അദ്ദേഹം കൂട്ടിച്ചേര്‍ത്തു.