തിരുവനന്തപുരം: മലബാര്‍ മേഖലയില്‍ ഉല്‍പ്പാദിപ്പിക്കുന്ന പാല്‍ പൂര്‍ണമായും ഉപയോഗിച്ചശേഷമേ അന്യസംസ്ഥാനങ്ങളില്‍നിന്ന് പാല്‍ വാങ്ങാവൂ എന്ന് സംസ്ഥാന ക്ഷീരവിപണന ഫെഡറേഷനും മൂന്ന് മേഖലാ യൂനിയനുകള്‍ക്കും നിര്‍ദേശം നല്‍കുമെന്ന് മന്ത്രി കെ. രാജു നിയമസഭയെ അറിയിച്ചു.
മലബാര്‍ മേഖലയില്‍ വിപണനാവശ്യത്തെക്കാള്‍ കൂടുതല്‍ പാല്‍ സംഭരിക്കുന്നതിനാല്‍ അധികപാല്‍ പാല്‍പ്പൊടിയാക്കുന്നതിന് ലിറ്ററിന് 3.57 രൂപ ചെലവ് വരുന്നുണ്ട്. മലബാര്‍ മേഖലയില്‍ വിപണനത്തിനാവശ്യമായ പാലിനെക്കാള്‍ അധികം സംഭരിക്കുന്ന പാല്‍ പൂര്‍ണമായും സ്വീകരിക്കാതെ മറ്റു സംസ്ഥാനങ്ങളില്‍നിന്ന് കേരളത്തിലേക്ക് പാല്‍ കൊണ്ടുവരുന്ന രീതി തിരുവനന്തപുരം, എറണാകുളം മേഖലകള്‍ ചിലപ്പോഴെങ്കിലും സ്വീകരിക്കാറുണ്ട്. ഇത് അവസാനിപ്പിക്കുന്നതിനും കേരളത്തില്‍ ഉല്‍പ്പാദിപ്പിക്കുന്ന പാല്‍ പൂര്‍ണമായും സംഭരിച്ചതിനുശേഷം ആവശ്യമെങ്കില്‍ മാത്രം ഇതര സംസ്ഥാനങ്ങളെ ആശ്രയിച്ചാല്‍ മതി എന്നതിനും കര്‍ശന നിര്‍ദേശം നല്‍കുമെന്ന് കെ.വി വിജയദാസിന്റെ സബ്മിഷന് മറുപടിയായി മന്ത്രി പറഞ്ഞു.