ന്യൂഡല്‍ഹി: റിയോയില്‍ മത്സരിക്കുന്ന റെയില്‍വേ താരങ്ങള്‍ക്ക് സമ്മാനത്തുകയുമായി ഇന്ത്യന്‍ റെയില്‍വേ. സ്വര്‍ണം നേടുന്ന താരത്തിനു ഒരു കോടി സമ്മാനത്തുകയായി ലഭിക്കും. വെള്ളി, വെങ്കലം നേടുന്നവര്‍ക്ക് 75 ലക്ഷം, 50 ലക്ഷം എന്നിങ്ങനെയാണ് സമ്മാനത്തുക. ആദ്യ എട്ടിലെത്തിയാല്‍ 30 ലക്ഷം. പങ്കെടുക്കുന്നവര്‍ക്ക് അഞ്ചു ലക്ഷവും ലഭിക്കും.

പരിശീലകര്‍ക്ക് അഞ്ചു ലക്ഷം വീതം നല്‍കാനും തീരുമാനമുണ്ട്. റെയില്‍വേസിന്റെ 35 താരങ്ങളും ആറു പരിശീലകരും റിയോയിലെത്തിയിട്ടുണ്ട്. മെഡല്‍ നേടുന്ന താരങ്ങള്‍ക്ക് ജോലി നല്‍കുമെന്നും താരങ്ങള്‍ക്കു വേണ്ട സ്ഥലങ്ങളില്‍ നിയമനം നല്‍കുമെന്നും റെയില്‍വേ മന്ത്രാലയം പത്രക്കുറിപ്പില്‍ വ്യക്തമാക്കി.