തലശ്ശേരി: ചേറ്റംകുന്നില്‍ വീടിന്റെ ജനല്‍ തകര്‍ത്ത് 60 പവന്‍ സ്വര്‍ണാഭരണം കവര്‍ന്നു. ചേറ്റംകുന്ന് ഹസീന മന്‍സിലില്‍ ആഷിഫിന്റെ വീട്ടില്‍ നിന്നാണ് അലമാരയില്‍ സൂക്ഷിച്ചിരുന്ന സ്വര്‍ണം കൊള്ളയടിച്ചത്. ജനല്‍ കമ്പി തകര്‍ത്ത് അകത്തുകടന്ന കവര്‍ച്ചാസംഘം കിടപ്പുമുറിയിലെ അലമാര കുത്തിപ്പൊളിച്ച് ലോക്കറില്‍ സൂക്ഷിച്ചിരുന്ന സ്വര്‍ണം കവരുകയായിരുന്നു. ബന്ധുവിന്റെ വിവാഹത്തില്‍ പങ്കെടുക്കാന്‍ 24ന് വീടുപൂട്ടി പോയ ആഷിഫും കുടുംബവും തിങ്കളാഴ്ച രാത്രി തിരിച്ചെത്തിയപ്പോഴാണു വീടിന്റെ ജനല്‍ തകര്‍ത്തതായി കണ്ടത്. തുടര്‍ന്നു നടത്തിയ പരിശോധനയിലാണ് സ്വര്‍ണം നഷ്ടപ്പെട്ടതു ശ്രദ്ധയില്‍പ്പെട്ടത്. സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചു. സി.ഐ എം.പി ആസാദ്, എസ്.ഐ എം. അനില്‍ എന്നിവരുടെ നേതൃത്വത്തില്‍ പൊലിസും വിരലടയാള വിദഗ്ധരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി.
വീട്ടില്‍ നിന്നിറങ്ങിയ പൊലിസ് നായ കോടതിയുടെ പിന്‍ഭാഗം വരെ ഓടിയെത്തി.