ഡിസംബര്‍ ഒന്നിന് വൈകിട്ട് 4 മണിക്ക് ജില്ലാ കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ ചെര്‍പുളശ്ശേരിയില്‍ ജനകീയ വിചാരണ നടക്കും
പാലക്കാട്: പി.കെ ശശി എം.എല്‍.എ സ്ഥാനത്ത് നിന്ന് രാജിവെക്കണമെന്നാവശ്യപ്പെട്ട് പ്രക്ഷോഭം ആരംഭിക്കുവാന്‍ ജില്ലാ കോണ്‍ഗ്രസ് കമ്മിറ്റി തീരുമാനിച്ചു. എം.എല്‍.എ യുടെ ഔദ്യോഗിക പരിപാടികള്‍ കോണ്‍ഗ്രസ് ബഹിഷ്‌കരിക്കും. ഇന്ന് വൈകിട്ട് ഷൊര്‍ണൂര്‍ നിയോജക മണ്ഡലത്തിലെ എല്ലാ മണ്ഡലം കോണ്‍ഗ്രസ് കമ്മിറ്റികളുടെയും ആഭിമുഖ്യത്തില്‍ എം.എല്‍.എയുടെ രാജി ആവശ്യപ്പെട്ട് പ്രതിഷേധ പ്രകടനം നടത്തും. ഡിസംബര്‍ ഒന്നിന് വൈകിട്ട് 4 മണിക്ക് ജില്ലാ കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ ചെര്‍പുളശ്ശേരിയില്‍ നടക്കുന്ന ജനകീയ വിചാരണ കെ.പി.സി.സി പ്രചാരണ സമിതി അധ്യക്ഷന്‍ കെ. മുരളീധരന്‍ ഉദ്ഘാടനം ചെയ്യും.
സ്ത്രീപീഢന വിഷയത്തില്‍ പാര്‍ട്ടി കുറ്റക്കാരനാണെന്ന് കണ്ട വ്യക്തി ജനപ്രതിനിധിയായി തുടരുന്നതിനെ ന്യായീകരിക്കുന്ന സി.പി.എമ്മിന്റെ ഇരട്ടത്താപ്പ് ഇതിനോടകം വ്യക്തമായിരിക്കുകയാണെന്ന് യോഗം വിലയിരുത്തി. സ്ത്രീ സുരക്ഷയില്‍ സി.പി.എമ്മിന് ആത്മാര്‍ഥത ഉണ്ടെങ്കില്‍ ശശിയോട് എം.എല്‍.എ സ്ഥാനം രാജിവെക്കാന്‍ പാര്‍ട്ടി പറയണം. വി.കെ ശ്രീകണ്ഠന്‍ യോഗത്തില്‍ അധ്യക്ഷനായി. വി. എസ്. വിജയരാഘവന്‍, സി.വി ബാലചന്ദ്രന്‍, കെ.എ ചന്ദ്രന്‍, പി.ജെ പൗലോസ്, സി. ചന്ദ്രന്‍, എ. രാമസ്വാമി, പി.വി രാജേഷ്, സി.എച്ച് ഷൗക്കത്തലി, ടി.കെ ഹമീദ്, പി. മാധവന്‍ എന്നിവര്‍ പ്രസംഗിച്ചു.