ലഖ്‌നോ: ബാബരി മസ്ജിദ് വിധിയുടെ പശ്ചാത്തലത്തില്‍ മുസ്‌ലിം പേഴ്‌സനല്‍ ലോ ബോര്‍ഡ് എടുത്ത തീരുമാനത്തില്‍ നിര്‍ണായകമായി സമസ്ത കേരള ജംഇയ്യത്തുല്‍ ഉലമയുടെ നിര്‍ദേശം. യോഗത്തില്‍ പരിഗണിക്കപ്പെടേണ്ട പ്രധാനപ്പെട്ട അഞ്ചു നിര്‍ദേശങ്ങള്‍ സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി പ്രൊഫ.കെ ആലിക്കുട്ടി മുസ്‌ലിയാര്‍ പേഴ്‌സനല്‍ ലോ ബോര്‍ഡ് പ്രസിഡന്റ് സയ്യിദ് മുഹമ്മദ് റാബി അല്‍ഹസന്‍ നദ്‌വിക്ക് കൈമാറിയത്.

സമസ്ത മുന്നോട്ടുവച്ച അഞ്ച് നിര്‍ദേശങ്ങള്‍

1. ബാബരി മസ്ജിദ് സുപ്രിംകോടതിയുടെ വിധിക്കെതിരായി ദ സുപ്രിം കോര്‍ട്ട് റൂള്‍സ്, 1966 ഭാഗം എട്ട് ഓര്‍ഡര്‍ 40 പ്രകാരം പുന:പരിശോധനാ ഹരജി ഫയല്‍ ചെയ്യുക
2. ശരീഅത്ത് നിയമത്തിനും വഖ്ഫ് ആക്ട് 1995 വകുപ്പ് 104 എ ക്കും എതിരായതിനാലും കോടതി വിധിയില്‍ നഷ്ടപരിഹാരമെന്നോ ആശ്വാസമെന്നോ വ്യക്തമാക്കാത്തതിനാലും ബാബരി മസ്ജിദ് നിലനിന്നിരുന്ന വഖ്ഫ് ഭൂമിക്ക് പകരം മറ്റൊരു അഞ്ച് ഏക്കര്‍ ഭൂമി നല്‍കാനുള്ള സുപ്രിംകോടതിയുടെ നിര്‍ദേശം സ്വീകരിക്കണമോ എന്നത് ഗൗരവമായി ചര്‍ച്ച നടത്തുകയും കഴിയുംവിധം സൗഹാര്‍ദപൂര്‍വം നിരസിക്കുകയും ചെയ്യുക
3. ദ അയോധ്യ അക്വിസിഷന്‍ ആക്ട്, 1993 പ്രകാരം അന്നത്തെ കേന്ദ്ര സര്‍ക്കാര്‍ പിടിച്ചെടുത്ത 68 ഏക്കര്‍ ഭൂമിയില്‍ നിന്ന് നിലവിലെ സുപ്രിംകോടതി വിധി ബാധകമായ 2.77 ഏക്കര്‍ കഴിച്ച് ബാക്കിയുള്ള 65.23 ഏക്കര്‍ വഖ്ഫ് ഭൂമി മുസ്‌ലിംകള്‍ക്ക് തിരിച്ചുലഭിക്കാനുള്ള നടപടിക്രമങ്ങള്‍ ആരംഭിക്കുക
4. ദ പ്ലൈസസ് ഓഫ് വെര്‍ഷിപ്പ് (പ്രൊവിഷന്‍സ്) ആക്ട് 1991 എന്നത് ഭൂമിയുടെ ഉടമസ്ഥ രേഖയുടെ അഭാവം പരിഹരിക്കാന്‍ മാത്രമേ ഉപകരിക്കുകയുള്ളൂ എന്നതിനാല്‍ വിശ്വാസം മനദണ്ഡമാക്കി (റേഷ്യോ ഡെസിഡന്റി) യുള്ള കേസുകളില്‍ ബാബരി മസ്ജിദ് വിധി കീഴ്‌വഴക്ക (പ്രസീഡന്റ്) മാക്കാതിരിക്കാനുള്ള നടപടിക്രമങ്ങള്‍ സ്വീകരിക്കുക
5. ബാബരി മസ്ജിദ് തകര്‍ത്തവര്‍ക്കെതിരായി സി.ബി.ഐ സ്‌പെഷല്‍ കോടതിയുടെ പരിഗണനയിലുള്ള ക്രിമിനല്‍ കേസ് നടപടിക്രമങ്ങള്‍ വേഗത്തിലാക്കാന്‍ വേണ്ട കാര്യങ്ങള്‍ ചെയ്യുക

ലഖ്‌നൗവിലെ ദയൂബന്ദ് ദാറുല്‍ ഉലൂമില്‍ നടന്ന യോഗത്തില്‍ സമസ്ത ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ പങ്കെടുത്തു.

ഇപ്പോഴത്തെ വിധിയിലെ അഞ്ചേക്കര്‍ സ്ഥലം നല്‍കണമെന്നത് നീതിയല്ലെന്നും രാജ്യത്തിനേല്‍പ്പിച്ച ക്ഷതത്തെ പരിഹരിക്കുന്നതല്ലെന്നും പേഴ്‌സനല്‍ ലോ ബോര്‍ഡ് വാര്‍ത്താസമ്മേളനത്തില്‍ പറഞ്ഞു.