കണ്ണൂര്‍: ദേശീയ വിരവിമുക്ത ദിനമായ ഓഗസ്റ്റ് 10ന് ജില്ലയിലെ മുഴുവന്‍ കുട്ടികള്‍ക്കും വിരനശീകരണ ഗുളിക നല്‍കും. ഒന്നുമുതല്‍ 19 വയസുവരെയുളള കുട്ടികള്‍ക്കാണ് വിര നശീകരണത്തിനായുളള ആല്‍ബന്‍ഡസോള്‍ ഗുളിക നല്‍കുന്നത്. സര്‍ക്കാര്‍, എയ്ഡഡ്, അണ്‍ എയ്ഡഡ് സ്‌കൂളുകളിലെ വിദ്യാര്‍ഥികള്‍ക്കും, അങ്കണവാടികളിലെയും ഡേകെയര്‍ സെന്ററുകളിലെയും കുട്ടികള്‍ക്കുമാണ് ഗുളിക നല്‍കുകയെന്ന് ഡി.എം.ഒ അറിയിച്ചു.  
ഡോക്ടര്‍മാര്‍, ആരോഗ്യ പ്രവര്‍ത്തകര്‍ എന്നിവരുടെ മേല്‍നോട്ടത്തില്‍ അധ്യാപകര്‍, അങ്കണവാടി വര്‍ക്കര്‍മാര്‍ എന്നിവരാണ് ഗുളിക നല്‍കേണ്ടത്.  ഒന്നുമുതല്‍ അഞ്ചുവയസുവരെയുളളവര്‍ക്ക് അടുത്തുളള അങ്കണവാടിയിലും, ആറുമുതല്‍ 19 വയസുവരെ സ്‌കൂളുകളിലും വച്ചാണ് ഗുളിക വിതരണം നടത്തുന്നത്.  ഒന്നുമുതല്‍ രണ്ടുവയസുവരെയുള്ള കുട്ടികള്‍ക്ക് പകുതി ഗുളിക ഒരു ടേബിള്‍സ്പൂണ്‍ തിളപ്പിച്ചാറ്റിയ വെളളത്തില്‍ അലിയിച്ച് കൊടുക്കണം.  രണ്ടുമുതല്‍ 19 വയസുവരെയുള്ളവര്‍ ഒരു ഗുളിക ഉച്ച ഭക്ഷണത്തിനുശേഷം ഒരു ഗ്ലാസ് തിളപ്പിച്ചാറ്റിയ വെളളത്തോടൊപ്പം ചവച്ചരച്ച് കഴിക്കണം.  
ഓഗസ്റ്റ് 10 ന് ഗുളിക കഴിക്കാന്‍ സാധിക്കാത്തവര്‍ സമ്പൂര്‍ണ വിരവിമുക്തദിനമായ 17 ന് നിര്‍ബന്ധമായും കഴിക്കേണ്ടതാണ്.  സ്‌കൂളുകളിലും, അംഗന്‍വാടികളിലും രജിസ്റ്റര്‍ ചെയ്യാത്ത ഒന്നുമുതല്‍ 19 വയസുവരെയുളള എല്ലാ കുട്ടികള്‍ക്കും പ്രായഭേദമന്യേ ആശ പ്രവര്‍ത്തകരുടെ സഹകരണത്തോടെ അംഗന്‍വാടികളില്‍ വച്ച് ഗുളിക നല്‍കും. വിരകള്‍ രക്തത്തിലെ ഹീമോഗ്ലോബിന്റെ അളവ് കുറക്കുകയും കുട്ടികളില്‍ വിളര്‍ച്ചക്കും പോഷണക്കുറവിനും തളര്‍ച്ച, വിശപ്പില്ലായ്മ എന്നിവക്കും കാരണമാകും. ആറു മാസത്തിലൊരിക്കല്‍ വിരമരുന്ന് നല്‍കേണ്ടത് അനിവാര്യമാണെന്നതിനാല്‍ വിരവിമുക്ത സമൂഹചികിത്സാ പരിപാടിയില്‍ കുട്ടികള്‍ക്ക് വിരമരുന്ന് നല്‍കാന്‍ രക്ഷിതാക്കള്‍ തയാറാകണമെന്ന് ഡി.എം.ഒ വ്യക്തമാക്കി.