ഭുവനേശ്വര്‍: ലോകകപ്പ് ഹോക്കിയില്‍ ഇന്ത്യയും ബെല്‍ജിയവും തമ്മിലുള്ള മത്സരം സമനിലയില്‍ കലാശിച്ചു. ആവേശപ്പോരില്‍ മത്സരം അവസാനിക്കാന്‍ മിനുട്ടുകള്‍ മാത്രം ബാക്കിനില്‍ക്കെയായിരുന്നു ഇന്ത്യയുടെ ഹൃദയം തകര്‍ത്ത് ബെല്‍ജിയത്തിന്റെ സമനില ഗോള്‍ പിറന്നത്. ഇതോടെ ആവേശത്തിലായിരുന്നു കലിംഗ സ്റ്റേഡിയം തരിച്ചു നിന്നു.
2-2 സ്‌കോറിനായിരുന്നു കളിയവസാനിച്ചത്. മത്സരം സമനിലയില്‍ കലാശിച്ചെങ്കിലും അടുത്ത മത്സരം വരുതിയിലാക്കിയാല്‍ ഇന്ത്യക്ക് നോക്കൗട്ട് റൗണ്ടിലെത്താനാകും.
എട്ടിന് കാനഡയുമായിട്ടാണ് ഇന്ത്യയുടെ അവസാന ഗ്രൂപ്പ്ഘട്ട മത്സരം. ബെല്‍ജിയം ദക്ഷിണാഫ്രിക്കയേയും നേരിടും. എട്ടാം മിനുട്ടില്‍ അലക്‌സാണ്ടര്‍ ഹെന്‍ട്രിക്‌സിന്റെ ഗോളില്‍ ബെല്‍ജിയം മുന്നിലെത്തി.
ആദ്യ പകുതിയില്‍ ഇന്ത്യ ഒരു ഗോളിന് പിന്നില്‍ നിന്നെങ്കിലും പിന്നീട് ഇന്ത്യ ഗംഭീര തിരിച്ചു വരവാണ് നടത്തിയത്. തുടരെ രണ്ട് ഗോളുകള്‍ തിരിച്ചടിച്ച് ഇന്ത്യ ഒരു ഗോളിന്റെ ലീഡ് നേടി.
എന്നാല്‍ മത്സരം അവസാനിക്കാന്‍ നാലു മിനുട്ട് മാത്രം ബാക്കി നില്‍ക്കെ സൈമണ്‍ ഗൗഡാര്‍ഡിലൂടെ ബെല്‍ജിയം സമനില ഗോള്‍ കണ്ടെത്തി വിലപ്പെട്ട ഒരു പോയിന്റ് സ്വന്തമാക്കി കളിയവസാനിപ്പിച്ചു. ഇതേ ഗ്രൂപ്പില്‍ നടന്ന മറ്റൊരു മത്സരത്തില്‍ ദക്ഷിണാഫ്രിക്ക കാനഡയെ 1-1 എന്ന സ്‌കോറിന് സമനിലയില്‍ തളച്ചു.