കണ്ണൂര്‍: കണ്ണൂരിലും കോട്ടയം ഏറ്റുമാനൂരിലും അധ്യാപകര്‍ വിദ്യാര്‍ഥിനികളെ പീഡിപ്പിച്ചതായി പരാതി. ഏറ്റുമാനൂരില്‍ 16 വിദ്യാര്‍ഥികളെയാണ് പീഡനത്തിനിരയാക്കിയത്. എന്നിട്ടും ഇയാളെ സംരക്ഷിക്കുകയായിരുന്നു പ്രധാന അധ്യാപകനെന്നാണ് പരാതി. ഇയാള്‍ക്കെതിരെ നടപടി എടുക്കാത്തതില്‍ പ്രതിഷേധിച്ച് 95 വിദ്യാര്‍ഥിനികള്‍ പഠിപ്പ് അവസാനിപ്പിച്ച് സ്‌കൂള്‍ വിട്ടുപോയിട്ടും സ്‌കൂള്‍ അധികൃതര്‍ കുലുങ്ങിയതുമില്ല. ഒടുവില്‍ രക്ഷിതാക്കളും ജില്ലാ കലക്ടറും നല്‍കിയ പരാതിയിലാണ് നരേന്ദ്രബാബുവിനെ പോക്‌സോ നിയമപ്രകാരം അറസ്റ്റ് ചെയ്തത്.

കണ്ണൂര്‍ പയ്യാവൂരിലെ സ്വകാര്യ സ്‌കൂളിലെ എട്ടു വിദ്യാര്‍ഥികളെയാണ് അധ്യാപകന്‍ പീഡിപ്പിച്ചതായി പരാതിയുയര്‍ന്നത്. കൗണ്‍സലിംഗിനിടെയാണ് വിദ്യാര്‍ഥികള്‍ അധ്യാപകനെതിരേ ശക്തമായ പരാതി ഉയര്‍ത്തിയത്. ജില്ലാ ലീഗല്‍ സര്‍വിസ് അതോറിറ്റിയും കൗണ്‍സലിംഗില്‍ പങ്കെടുത്തിരുന്നു. പരാതി സത്യമാണെന്നു ബോധ്യമായതോടെ അധ്യാപകനെ സ്‌കൂളില്‍ നിന്ന് സസ്‌പെന്‍ഡ് ചെയ്തിട്ടുണ്ട്. ഇതു സംബന്ധിച്ച പരാതി ജില്ലാ പൊലിസ് സുപ്രണ്ടിന് കൈമാറും.

അതേ സമയം ഏറ്റുമാനൂരിലെ സര്‍ക്കാര്‍ മോഡല്‍ റസിഡന്‍ഷ്യല്‍ സ്‌കൂളില്‍ വിദ്യാര്‍ഥികളെ ലൈംഗിക ചൂഷണം ചെയ്തതിന് അറസ്റ്റിലായ അധ്യാപകനെതിരെ നേരത്തെയും സമാന പരാതി ലഭിച്ചിട്ടും പൊലിസില്‍ അറിയിക്കാതെ സ്‌കൂള്‍ അധികൃതര്‍ പരാതി പൂഴ്ത്തുകയായിരുന്നുവെന്ന ആക്ഷേപം ശക്തമായിട്ടുണ്ട്. കൗണ്‍സിലറോടാണ് വിദ്യാര്‍ഥികള്‍ ഇക്കാര്യം വെളിപ്പെടുത്തിയത്.

ഗുരുതര ആരോപണങ്ങളാണ് കേസില്‍ പുറത്ത് വരുന്നത്. 16 വിദ്യാര്‍ഥിനികളെ ലൈംഗികമായ ചൂഷണം ചെയ്തതിന് പോക്‌സോ കേസില്‍ അറസ്റ്റിലായ സംഗീത അധ്യാപകന്‍ ഒരു വര്‍ഷം മുന്‍പും സമാന ആരോപണം നേരിട്ടിരുന്നു. അന്നും നരേന്ദ്രബാബുവെന്ന അധ്യാപകനെതിരെയുള്ള പരാതി പൊലീസില്‍ അറിയിക്കാതെ പ്രധാന അധ്യാപകനും സീനിയര്‍ സൂപ്രണ്ടും ചേര്‍ന്ന് മുക്കിയെന്നാണ് ഉയരുന്ന പരാതി.

കഴിഞ്ഞ മാസം പതിനാറാം തീയതിയാണ് 16 വിദ്യാര്‍ത്ഥികള്‍ സംഗീത അധ്യാപകന്‍ നരേന്ദ്രബാബുവിനെതിരെ രംഗത്ത് വന്നത്. ലൈംഗിക ചൂഷണം നടത്തുന്നുവെന്ന് കുട്ടികള്‍ കൗണ്‍സിലര്‍ക്ക് രേഖാമൂലം എഴുതി നല്‍കി. കൗണ്‍സിലര്‍ പ്രധാന അധ്യാപകനെയും സീനിയര്‍ സൂപ്രണ്ടിനെയും വിവരം അറിയിച്ചെങ്കിലും അവര്‍ പൊലിസിനോട് പരാതിപ്പെടാന്‍ തയാറായില്ല.