സ്വന്തം ലേഖകന്‍
കണ്ണൂര്‍: നാലാമത് ദേശീയ സീനിയര്‍ വനിതാ ബോക്‌സിങ് ചാംപ്യന്‍ഷിപ്പിനു മുണ്ടയാട് ഇന്‍ഡോര്‍ സ്‌റ്റേഡിയത്തില്‍ തുടക്കമായി. 48-51 കിലോഗ്രാം ഫ്‌ളൈ വെയ്റ്റ്, 45-48 ലൈറ്റ് ഫ്‌ളൈ വെയ്റ്റ് എന്നീ വിഭാഗങ്ങളിലെ ഒന്നാംഘട്ട മത്സരങ്ങള്‍ ആദ്യദിനത്തില്‍ പൂര്‍ത്തിയായി. ഇരുവിഭാഗങ്ങളിലുമായി 23 മത്സരങ്ങളാണ് നടന്നത്.
പൊലിസ്, റെയില്‍വേ, ഹരിയാന, ഡല്‍ഹി തുടങ്ങിയ ടീമുകളില്‍ നിന്നായി ഇരുപതോളം അന്തര്‍ദേശീയ താരങ്ങള്‍ ചാംപ്യന്‍ഷിപ്പില്‍ പങ്കെടുക്കുന്നുണ്ട്. 32 യൂനിറ്റുകളിലെ ബോക്‌സര്‍മാര്‍ ഇടിക്കൂട്ടില്‍ മാറ്റുരയ്ക്കും. 10 ഭാര വിഭാഗങ്ങളിലായാണ് മത്സരം. ആദ്യഘട്ട മത്സരങ്ങള്‍ ഇന്ന് പൂര്‍ത്തിയാകും. ഏഴിനു രണ്ടുമുതല്‍ സെമി ഫൈനല്‍ മത്സരവും എട്ടിനു രണ്ടു മുതല്‍ ഫൈനല്‍ മത്സരവും നടക്കും.