മട്ടന്നൂര്‍: വിമാനത്താവളത്തില്‍ ജോലി നല്‍കുമെന്ന കിയാല്‍ എം.ഡിയുടെ വാഗ്ദാനം പാലിക്കാത്തതില്‍ പ്രതിഷേധിച്ച് താല്‍ക്കാലിക തൊഴിലാളികളുടെ നേതൃത്വത്തില്‍ വിമാനത്താവള കവാടത്തില്‍ ഉപരോധം നടത്തി.
നിര്‍മാണത്തൊഴിലാളികള്‍ക്ക് തൊഴില്‍ നല്‍കണമെന്ന് ആവശ്യപ്പെട്ടാണ് പ്രധാന കവാടത്തിനു മുന്നില്‍ ഇന്നലെ രാവിലെ സമരം നടത്തിയത്. ഡി.വൈ.എഫ്.ഐ കല്ലേരിക്കര യൂനിറ്റും ഐശ്വര്യ ക്ലബും സംയുക്തമായാണ് നാട്ടുകാരും തൊഴിലാളികളും സമരം നടത്തിയത്. സ്ത്രീകള്‍ അടക്കമുള്ളവര്‍ സമരത്തിനെത്തി. സമരം കാരണം വിമാനത്താവളത്തിലേക്കു കടന്നുപോകേണ്ട വാഹങ്ങള്‍ പലതും രണ്ടാംകവാടം വഴി കടത്തിവിട്ടു.
തുടര്‍ന്ന് സമരക്കാരും വിമാനത്താവള അധികൃതരും നടത്തിയ ചര്‍ച്ചയില്‍ എം.ഡിയെ കണ്ട് നിവേദനം നല്‍കാമെന്ന ഉറപ്പിന്‍മേലാണ് സമരം അവസാനിപ്പിച്ചത്.