പാലക്കാട്: നാല് ആനക്കൊമ്പുകള്‍ വീട്ടില്‍ സൂക്ഷിച്ചകേസില്‍ മോഹന്‍ലാലിനെ രക്ഷിക്കാന്‍ അന്നത്തെ വനംമന്ത്രി ഗണേഷ്‌കുമാറും, വനംവകുപ്പ് ഉദ്യോഗസ്ഥരും ചേര്‍ന്ന് ചട്ടലംഘനം നടത്തി പ്രത്യേക ഉത്തരവിറക്കിയത് ഗുരുതര വീഴ്ചയാണെന്ന് കണ്‍ട്രോളര്‍ ആന്‍ഡ് ഓഡിറ്റര്‍ ജനറല്‍ കണ്ടെത്തിയ സാഹചര്യത്തില്‍ മോഹന്‍ലാലിനെ പ്രതിയാക്കി കേസ് വീണ്ടും രജിസ്റ്റര്‍ ചെയ്യണമെന്ന് എന്‍.എ.പി.എം ദേശീയ കണ്‍വീനര്‍ വിളയോടി വേണുഗോപാല്‍ വാര്‍ത്താസമ്മേളനത്തില്‍ ആവശ്യപ്പെട്ടു.
2016ല്‍ കേസ് അന്വേഷണത്തിന്റെ തുടര്‍നടപടി ഹൈക്കോടതി സ്റ്റേ ചെയ്യാന്‍ അനുകൂലമായി സര്‍ക്കാര്‍ കോടതിയില്‍ സത്യവാങ്മൂലം ചെയ്തിരുന്നു. മാനിനെ വേട്ടയാടിയ സംഭവത്തില്‍ ചലചിത്ര താരം സല്‍മാന്‍ ഖാന് ജയില്‍ ശിക്ഷ ലഭിച്ചിരുന്നു. കാട്ടില്‍നിന്നും വന്യമൃഗങ്ങളെ കൊന്നാല്‍ സാധാരണക്കാരനെ പിടിച്ച് ജയിലിലിടുന്ന വനംവകുപ്പ് മോഹന്‍ലാലിനെ കേസില്‍നിന്നും രക്ഷിക്കാന്‍ ചട്ടം ലംഘിച്ച് ഉത്തരവിറക്കി.
ഇതിനെക്കുറിച്ച് അന്വേഷണം നടത്തണം. പ്രമാണിമാര്‍ക്കൊരു നിയമവും, പാവപ്പെട്ടവന് മറ്റൊരു നിയമവും ഉണ്ടാക്കിയ വനംവകുപ്പിലെ അന്നത്തെ ഉദ്യോഗസ്ഥര്‍ ഗുരുതര വീഴ്ചയാണ് വരുത്തിയത്. അതുകൊണ്ട് കേസ് രജിസ്റ്റര്‍ ചെയ്ത് വീണ്ടും കേസ് അന്വേഷിക്കണമെന്നാവശ്യപ്പെട്ടൂ കോടതിയെ സമീപിക്കുമെന്ന് അദ്ദേഹം പറഞ്ഞു. വാര്‍ത്താസമ്മേളനത്തില്‍ വി.പി നിജാമുദ്ധീന്‍, മലമ്പുഴ ഗോപാലന്‍ എന്നിവരും സംബന്ധിച്ചു.