ന്യൂഡല്‍ഹി: ഐ.എന്‍.എക്‌സ് മീഡിയ കേസില്‍ ജയില്‍ മോചിതനായ മുന്‍ധനമന്ത്രി പി ചിദംബരം പാര്‍ലമെന്റില്‍ എത്തി. പാര്‍ലമെന്റില്‍ എന്റെ ശബ്ദത്തെ അടിച്ചമര്‍ത്താന്‍ സര്‍ക്കാരിന് കഴിയില്ലെന്ന് അദ്ദേഹം മാധ്യമങ്ങളോട് പറഞ്ഞു. സ്വാതന്ത്ര്യത്തിൻറ ശുദ്ധവായു ശ്വസിക്കാനായതിൽ സന്തോഷമുണ്ടെന്നും അദ്ദേഹം പ്രതികരിച്ചു. 

ഉള്ളിവിലവര്‍ധനയ്‌ക്കെതിരെ കോണ്‍ഗ്രസ് എം.പിമാര്‍ നടത്തുന്ന സമരത്തില്‍ അദ്ദേഹം പങ്കെടുത്തു. 

മാധ്യമങ്ങളെ കാണുമെന്ന് ഇന്നലെ ചിദംബരം അറിയിച്ചിരുന്നു. ഐ.എന്‍.എക്‌സ് മീഡിയയുമായി ബന്ധപ്പെട്ട് എന്‍ഫോഴ്‌സ്‌മെന്റ് ഡയരക്ടറേറ്റ് രജിസ്റ്റര്‍ ചെയ്ത കേസില്‍ സുപ്രിംകോടതി ജാമ്യം അനുവദിച്ചതിനെത്തുടര്‍ന്നാണ് ചിദംബരം ജയില്‍മോചിതനായത്.

രാവിലെ തന്നെ സുപ്രിംകോടതി ജാമ്യം അനുവദിച്ചിരുന്നെങ്കിലും നടപടിക്രമങ്ങള്‍ പൂര്‍ത്തിയാക്കി രാത്രി എട്ടരയോടെയാണ് ചിദംബരം ജയില്‍മോചിതനായത്. ജയിലില്‍ നിന്നിറങ്ങിയ ശേഷം കോണ്‍ഗ്രസ് അധ്യക്ഷ സോണിയാഗാന്ധിയെ അദ്ദേഹം കണ്ടു.

ഓഗസ്റ്റ് 21നാണ് ചിദംബരത്തെ സി.ബി.ഐ അറസ്റ്റ് ചെയ്തത്. സി.ബി.ഐ കേസില്‍ ജാമ്യം ലഭിച്ചതോടെ എന്‍ഫോഴ്‌സ്‌മെന്റും ഇതേ കേസ് രജിസ്റ്റര്‍ ചെയ്ത് ജയിലില്‍ തുടരേണ്ട സാഹചര്യമുണ്ടാക്കുകയായിരുന്നു. സി.ബി.ഐ രജിസ്റ്റര്‍ ചെയ്ത കേസില്‍ സുപ്രിംകോടതി നേരത്തെ ജാമ്യം അനുവദിച്ചിരുന്നു.