കൊച്ചി : ലോക അത്‌ലറ്റിക് മീറ്റില്‍ പങ്കെടുപ്പിക്കുന്നതിനാവശ്യമായ നടപടി സ്വീകരിക്കണമെന്ന ഇടക്കാല ഉത്തരവു പാലിച്ചില്ലെന്നാരോപിച്ച് പി.യു ചിത്ര നല്‍കിയ കോടതിയലക്ഷ്യ ഹരജി ഹൈക്കോടതി സിംഗിള്‍ബെഞ്ച് ഡിവിഷന്‍ ബെഞ്ചിന്റെ പരിഗണനയ്ക്കു വിട്ടു. ഹരജി ഡിവിഷന്‍ ബെഞ്ചിനു വിട്ടുകൊണ്ടുള്ള ഉത്തരവില്‍ കോടതിയലക്ഷ്യത്തെക്കുറിച്ച് സിംഗിള്‍ബെഞ്ച് പരാമര്‍ശമൊന്നും നടത്തിയിട്ടില്ല.
കഴിഞ്ഞ ദിവസം ഹരജി പരിഗണിക്കുമ്പോള്‍ ചിത്രയെ മീറ്റില്‍ പങ്കെടുപ്പിക്കാന്‍ കഴിയാതെ പോയതെന്തുകൊണ്ടാണെന്നും മത്സരാര്‍ഥികളുടെ അന്തിമ ലിസ്റ്റ് നല്‍കേണ്ട തിയതി കഴിഞ്ഞിട്ടും സുധ സിങിനെ എങ്ങനെ ഉള്‍പ്പെടുത്തിയെന്നും വിശദീകരിക്കാന്‍ ഇന്ത്യന്‍ അത്‌ലറ്റിക് ഫെഡറേഷനോടു സിംഗിള്‍ബെഞ്ച് നിര്‍ദേശിച്ചിരുന്നു. എന്നാല്‍ ഇന്നലെ ഹരജി വീണ്ടും പരിഗണനയ്ക്കു വന്നപ്പോള്‍ ഫെഡറേഷന്‍ ഭാരവാഹികളടക്കമുള്ളവര്‍ ലണ്ടനിലാണെന്നും ഇവര്‍ മടങ്ങി വന്നശേഷമേ വിശദീകരണം നല്‍കാനാവൂ എന്നും ഇന്ത്യന്‍ അത്‌ലറ്റിക് ഫെഡറേഷന്റെ അഭിഭാഷകന്‍ ബോധിപ്പിച്ചു.
ഈ നടപടി കോടതിയലക്ഷ്യം തന്നെയാണെന്നും ഫെഡറേഷന്‍ സെക്രട്ടറിയെ വിളിച്ചു വരുത്തി വിശദീകരണം തേടണമെന്നും ചിത്രയുടെ അഭിഭാഷകന്‍ വാദിച്ചു. തുടര്‍ന്നാണ് ഇതിന് അധികാരമുള്ള ഡിവിഷന്‍ ബെഞ്ചിന്റെ പരിഗണനയ്ക്ക് ഹരജി വിടാന്‍ സിംഗിള്‍ബെഞ്ച് നിര്‍ദേശിച്ചത്.