പള്ളുരുത്തി: പട്ടാപകല്‍ അടച്ചിട്ട വീട്ടില്‍ നിന്നു പണവും ആഭരണവും കവര്‍ന്നു. പെരുമ്പടപ്പ് എം.എ മാത്യു റോഡില്‍ വനജയുടെ വീട്ടില്‍ നിന്നുമാണ് അമ്പതിനായിരം രൂപയും സ്വര്‍ണാഭരണങ്ങളും കവര്‍ന്നത്.വീട്ടുകാര്‍ വീട് പൂട്ടി താക്കോല്‍ ഉമ്മറത്ത് ഷൂസിനുള്ളിലാക്കി വച്ചിരുന്നു. വീടിനടുത്തു തന്നെയായിരുന്നു ഇവര്‍ക്ക് കടയുണ്ടായിരുന്നത്. ഉച്ചക്ക് വീട്ടില്‍ വന്നു ഊണു കഴിഞ്ഞു പോയതിനു ശേഷം രാത്രിയോടെ വീട്ടുകാര്‍ തിരിച്ചു വന്നപ്പോഴാണ് ഷൂസിനകത്ത് സൂക്ഷിച്ചിരുന്ന താക്കോല്‍ എടുത്ത് വാതില്‍ തുറന്ന് മോഷ്ടാക്കള്‍ അകത്തു കയറിയത് ശ്രദ്ധയില്‍പ്പെട്ടത്. അലമാരയില്‍ തന്നെ താക്കോലും തൂക്കിയിട്ടിരുന്നതിനാല്‍ കള്ളന്‍മാര്‍ക്ക് കാര്യവും എളുപ്പമായി. പള്ളുരുത്തി പൊലിസില്‍ വീട്ടുകാര്‍ നല്‍കിയ പരാതിയെ തുടര്‍ന്ന് അന്വേഷണം ആരംഭിച്ചിട്ടുണ്ട്.