കൊട്ടിയം: അയത്തില്‍ പുന്തലത്താഴത്തെ സര്‍ക്കാര്‍ വക വിദേശമദ്യവില്‍പ്പനശാലയില്‍ ക്യൂ നില്‍ക്കുന്നതിനെ ചൊല്ലിയുണ്ടായ തര്‍ക്കത്തിനൊടുവില്‍ യുവാവ് കൊല്ലപ്പെട്ട സംഭവവുമായി ബന്ധപ്പെട്ട് മൂന്നു പേര്‍ പൊലിസിന്റെ പിടിയിലായി.
കിളികൊല്ലൂര്‍ കല്ലുംതാഴം നക്ഷത്രനഗര്‍ -66 സജുഭവനില്‍ സച്ചു എന്നു വിളിക്കുന്ന സജിന്‍ (22) കുണ്ടറ മാമൂട് പ്രവീണ്‍ വിലാസത്തില്‍ പ്രജോഷ് (28) കിളികൊല്ലൂര്‍ മേക്കോണ്‍ കണ്ണന്‍ കോളനിയില്‍ അനൂപ് (27) എന്നിവരാണ് പിടിയിലായത്.ഇക്കഴിഞ്ഞ മെയ് ആറാം തിയതി രാത്രിയില്‍ പട്ടത്താനം തോണ്ടലില്‍ വീട്ടില്‍ കുട്ടപ്പന്‍ എന്നു വിളിക്കുന്ന സുമേഷ് കുത്തേറ്റു മരിച്ച സംഭവവുമായി ബന്ധപ്പെട്ടാണ് ഇവരെ പൊലിസ് അറസ്റ്റ് ചെയ്തത്. സംഭവത്തെക്കുറിച്ച് പൊലിസ് പറയുന്നതിങ്ങനെ.
സംഭവ ദിവസം കേസിലെ പ്രധാന പ്രതിയായ സജിനും കൂട്ടുകാരും ചേര്‍ന്ന് കിളികൊല്ലൂരില്‍ റയില്‍വെ ട്രാക്കിനരികിലിരുന്ന് മദ്യപിക്കുകയും കൈയ്യിലുണ്ടായിരുന്ന മദ്യം തീര്‍ന്നതിനെ തുടര്‍ന്ന് സജിന്‍ പുന്തലത്താഴത്തുള്ള ബിവറേജസ് കോര്‍പറേഷന്റെ മദ്യവില്‍പ്പനശാലയില്‍ എത്തുകയും മദ്യം വാങ്ങാന്‍ ക്യൂ നിന്നവരുടെ ഇടയിലേക്ക് കയറാന്‍ ശ്രമിക്കുകയും ചെയ്തു.
ഈ സമയം കൊല്ലപ്പെട്ട സുമേഷും മദ്യം വാങ്ങാനായി ക്യൂവില്‍ നില്‍പ്പുണ്ടായിരുന്നു.
ഇയാളുടെ മുന്നില്‍ പ്രതിയായ സജിന്‍ കയറാന്‍ ശ്രമിച്ചത് തടഞ്ഞപ്പോള്‍ കൈയില്‍ കരുതിയിരുന്ന ആയുധം ഉപയോഗിച്ച് പ്രതി സുമേഷിനെ കുത്തിയശേഷം കടന്നുകളയുകയായിരുന്നു. പോസ്റ്റ്‌മോര്‍ട്ടത്തിലാണ് ഇത് കൊലപാതകമാണെന് തെളിഞ്ഞത്.
തുടര്‍ന്ന് കൊല്ലം സിറ്റി പൊലിസ് കമ്മീഷണര്‍ അജിതാ ബീഗത്തിന്റെ നിര്‍ദ്ദേശപ്രകാരം ഇരവിപുരം സി.ഐ പങ്കജാക്ഷന്റെ നേതൃത്വത്തില്‍ പ്രത്യേക അന്വേഷണ സംഘം രൂപീകരിച്ച് അന്വേഷണം നടത്തി വരികയായിരുന്നു.സംഭവത്തിന് ശേഷം ബാംഗ്ലൂരിലേക്ക് കടന്ന പ്രതി അയത്തില്‍ എത്തിയതറിഞ്ഞ് ഷാഡോ പൊലിസ് ഉള്‍പ്പെട്ട സംഘം ഇയാളെ പിടി കുടുകയായിരുന്നു.
സംഭവം നടന്നയുടന്‍ പൊലിസ് ആയിരക്കണക്കിന് മൊബൈല്‍ നമ്പരുകള്‍ പിന്തുടര്‍ന്ന് നടത്തിയ അന്വേഷണത്തിലാണ് പ്രതിയെ സഹായിച്ച 2 പേര്‍ കൂടി പിടിയിലായത്.ഒന്നാം പ്രതി സജിന്‍ വധശ്രമ കേസിലും മോഷണ കേസിലും പ്രതിയാണെന്ന് പൊലിസ് പറഞ്ഞു. കൊല്ലം എ.സി.പി ജോര്‍ജ് കോശി, ഇരവിപുരം സി.ഐ പങ്കജാക്ഷന്‍, എ.എസ്.ഐ ലഗേഷ്, എസ്.സി.പി.ഒ സുനില്‍കുമാര്‍, ഷാഡോ പൊലിസ് അംഗങ്ങളായ മനു, സീനു എന്നിവരടങ്ങിയ സംഘമാണ് പ്രതികളെ പിടികൂടിയത്. പ്രതികളെ കോടതിയില്‍ ഹാജരാക്കിയ ശേഷം കസ്റ്റഡിയില്‍ വാങ്ങുമെന്ന് പൊലിസ് പറഞ്ഞു .