കൊടുങ്ങല്ലൂര്‍: ഫിറ്റല്ലാതെ ഓടിയ സ്വകാര്യ ബസിന് മോട്ടോര്‍ വാഹന വകുപ്പ് പൂട്ടിട്ടു. കൊടുങ്ങല്ലൂര്‍ ഇരിങ്ങാലക്കുട റൂട്ടിലോടുന്ന ശാസ്ത ബസിനാണ് മോട്ടോര്‍ വാഹന വകുപ്പ് സ്റ്റോപ്പ് മെമ്മോ നല്‍കിയത്. അപകടകരമാം വിധം ദ്രവിച്ച പ്ലാറ്റ്‌ഫോമിലെ വിടവില്‍ യാത്രക്കാരുടെ കാല്‍ കുടുങ്ങുകയും മഴക്കാലത്ത് ബസിനകത്തേക്ക് റോഡിലെ മലിനജലം തെറിയ്ക്കുകയും ചെയ്യുന്നതായി പരാതി ലഭിച്ചതിനെ തുടര്‍ന്നാണ് ഉദ്യോഗസ്ഥര്‍ ബസ് പരിശോധിച്ചത്. വേണ്ടത്ര സുരക്ഷാ ക്രമീകരണങ്ങളില്ലെന്ന് കണ്ടെത്തിയതിനെ തുടര്‍ന്ന് ബസിന്റെ സര്‍വീസ് നിറുത്തി വെയ്ക്കാന്‍ നിര്‍ദേശം നല്‍കി. മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എസ് ഗിരീഷ് ,അസി: മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ കെ.ബി ഷിജൊ, രജീഷ് അടങ്ങിയ സംഘമാണ് ബസ് പിടികൂടിയത്.