കോലഞ്ചേരി (കൊച്ചി): ജില്ലാ സഹകരണ ബാങ്കുകള്‍ ഏകോപിപ്പിച്ച് കേരള ബാങ്ക് രൂപീകരിക്കുമ്പോള്‍ സഹകരണ മേഖലയുടെ നട്ടെല്ലായ കലക്ഷന്‍ ഏജന്റുമാര്‍ പടിക്കുപുറത്തേക്ക്.
കേരള ബാങ്കിന്റെ അടിസ്ഥാന ഘടകമായി മാറുന്ന സഹകരണസ്ഥാപനങ്ങളിലെ ചെറുകിട നിക്ഷേപ പിരിവുകാര്‍, വായ്പാ കലക്ഷന്‍ ജീവനക്കാര്‍ എന്നിവരെ സര്‍ക്കാരും മാനേജ്‌മെന്റുകളും പൂര്‍ണമായി അവഗണിച്ചിരിക്കുകയാണ്.
വീടുകള്‍, വ്യാപാര സ്ഥാപനങ്ങള്‍, വിവിധ തൊഴില്‍ കേന്ദ്രങ്ങള്‍ എന്നിവിടങ്ങളിലെ ചെറുകിട നിക്ഷേപങ്ങള്‍ സമാഹരിച്ച് ബാങ്കുകളിലെത്തിക്കുകയും വായ്പാ തിരിച്ചടവ് പിരിച്ചെടുക്കുകയും ചെയ്യുന്ന പതിനായിരത്തിലധികം ജീവനക്കാരുടെ ജീവിത സാഹചര്യമാണ് ഇതോടെ തുലാസിലായത്. 30- 45 വര്‍ഷത്തിലധികം സേവനമുള്ളവരടക്കം തങ്ങളുടെ ഭാവിയില്‍ ആശങ്കപ്പെടുന്നുണ്ട്. വര്‍ഷത്തില്‍ 6,500 കോടിയുടെ നിക്ഷേപം സ്വരൂപിക്കുന്നതിനും 9600 കോടി രൂപ വായ്പാ തിരിച്ചടവ് പിരിച്ചെടുക്കുന്നതിനും സഹകരണ മേഖലയ്ക്ക് ഈ വിഭാഗത്തിന്റെ സേവനം പ്രധാനമാണെന്ന് 2015ല്‍ അഡ്വ. സുരേഷ് ബാബു കമ്മിഷന്‍ വ്യക്തമാക്കിയിരുന്നതാണ്. പ്രാഥമിക സംഘങ്ങളുടെ നിക്ഷേപത്തിന്റെ 25 ശതമാനവും നിക്ഷേപ പിരിവുകാര്‍ മുഖേനയുള്ള ലഘുനിക്ഷേപങ്ങളാണെന്ന് 2008ല്‍ റിട്ട. സഹകരണ വകുപ്പ് റജിസ്ട്രാര്‍ രാധാകൃഷ്ണന്‍ കമ്മിഷനും റിപ്പോര്‍ട്ട് സമര്‍പ്പിച്ചിരുന്നു.
സാമൂഹികക്ഷേമ പെന്‍ഷനുകള്‍ ഗുണഭോക്താവിന്റെ കൈകളില്‍ നേരിട്ടെത്തിക്കുകയെന്ന സംസ്ഥാന സര്‍ക്കാരിന്റെ പ്രഖ്യാപിത ലക്ഷ്യം വിജയത്തിലെത്തിക്കുന്നതിലും ഈ വിഭാഗങ്ങള്‍ നിര്‍ണായക പങ്കുവഹിക്കുന്നുണ്ട്. മുന്‍ കാലങ്ങളില്‍ വിവിധതലങ്ങളിലൂടെ വിതരണംചെയ്യാന്‍ ശ്രമിച്ച് പരാജയപ്പെട്ട 32 ലക്ഷത്തോളം പേര്‍ക്കാണ് അഞ്ചുതരം പെന്‍ഷനുകള്‍ പരാതിക്കിട നല്‍കാത്തവിധം ഈ തൊഴിലാളികളിലൂടെ വിതരണം ചെയ്തുവരുന്നത്. നോട്ടുനിരോധനം, പ്രവര്‍ത്തന മൂലധനത്തിന്റെ പോരായ്മ എന്നിവ മൂലം സഹകരണ സ്ഥാപനങ്ങള്‍ പ്രതിസന്ധി നേരിട്ടപ്പോഴൊക്കെ കൈത്താങ്ങായി സംരക്ഷിച്ചത് ചെറുകിട നിക്ഷേപങ്ങളും നിക്ഷേപ പിരിവുകാരുമാണ്.
രാധാകൃഷ്ണന്‍ കമ്മിഷന്‍ റിപ്പോര്‍ട്ടില്‍ സേവന വേതന വ്യവസ്ഥകളില്‍ നിക്ഷേപ പിരിവുകാരെ അവഗണിച്ചെന്നും ഇവരുടെ ജീവിതസാഹചര്യം പാര്‍ട്‌ടൈം ജീവനക്കാരെക്കാള്‍ താഴെയാണെന്നും കണ്ടെത്തിയിരുന്നതാണ്.
സ്വരൂപിച്ചെത്തിക്കുന്ന നിക്ഷേപത്തിന്റെ രണ്ടുമുതല്‍ മൂന്ന് ശതമാനം വരെ കമ്മിഷനാണ് നിലവില്‍ ഇക്കൂട്ടര്‍ക്ക് വേതനമായി ലഭിക്കുന്നത്. വേതനം വെട്ടിക്കുറയ്ക്കലിനും ഭരണസമിതികളുടെ പിരിച്ചുവിടലിനും ഇവര്‍ വിധേയരാകാറുമുണ്ട്. 2005ല്‍ സഹകരണ ശതാബ്ദിയുടെ ഭാഗമായി മാനുഷിക പരിഗണന നല്‍കി ഈ വിഭാഗത്തെയും നീതി സ്റ്റോറുകളിലെ കമ്മിഷന്‍ ജീവനക്കാരെയും സ്ഥിരപ്പെടുത്താന്‍ സര്‍ക്കാര്‍ ഉത്തരവിട്ടിരുന്നതാണ്.