ഫറോക്ക് : ചെറുവണ്ണൂര്‍ മമ്മിളിക്കടവ് ക്ഷേത്രത്തില്‍ ഭണ്ഡാരം കുത്തിതുറന്നു കവര്‍ച്ച. ക്ഷേത്രത്തിനു പിറക് വശത്തെ രണ്ട് ഭണ്ഡാരങ്ങളാണ് കുത്തിപൊളിച്ച് പണം കവര്‍ന്നത്.
മറ്റൊരു ഭണ്ഡാരം കുത്തിപ്പൊളിക്കാന്‍ ശ്രമം നടത്തിയതായും ക്ഷേത്രഭാരവാഹികള്‍ അറിയിച്ചു. സന്ദര്‍ശകര്‍ കാണിക്കയായി നിക്ഷേപിക്കുന്ന പണമാണ് മോഷ്ടിച്ചത്. അതിരാവിലെ ക്ഷേത്രത്തില്‍ തൊഴാനെത്തിയവരാണ് ഭണ്ഡാരം തകര്‍ത്ത നിലയില്‍ കണ്ടത്. നല്ലളം എസ്.ഐ യു. സനീഷിന്റെ നേതൃത്വത്തില്‍ പൊലിസ് സ്ഥലത്തെത്തി പരിശോധന നടത്തി തെളിവുകള്‍ ശേഖരിച്ചു.
ക്ഷേത്രത്തില്‍ സ്ഥാപിച്ച സി.സി.ടി.വിയില്‍ പതിഞ്ഞ മോഷ്ടാവിന്റെ ചിത്രം ഭാരവാഹികള്‍ പൊലിസിനു കൈമാറി. ഇത് അഞ്ചാം തവണയാണ് ക്ഷേത്രത്തില്‍ മോഷണം നടക്കുന്നത്. 5000രൂപയോളം നഷ്ടപ്പെട്ടതായാണ് ക്ഷേത്രഭാരവാഹികള്‍ പൊലിസിന് നല്‍കിയ പരാതിയില്‍ പറയുന്നത്.
വിരലടയാള വിദഗ്ധരും ഡോഗ് സ്‌ക്വാഡും സംഭവ സ്ഥലത്തെത്തി പരിശോധന നടത്തി. ഭണ്ഡാരം കുത്തിപ്പൊളിക്കാന്‍ ഉപയോഗിച്ചതെന്നു കരുതുന്ന ഇരുമ്പ് ദണ്ഡ് സംഭവ സ്ഥലത്തുനിന്നും കണ്ടെടുത്തു.