മാനന്തവാടി: 20 വര്‍ഷത്തോളമായി ഉപയോഗയോഗ്യമല്ലാതെ കിടക്കുകയും നിരവധി പേര്‍ക്ക് ഉപകാരപ്രദമാവുകയും ചെയ്യേണ്ട തോട് തൊഴിലുറപ്പ് പദ്ധതിയില്‍ ഉള്‍പ്പെടുത്തി ശുചീകരിച്ചു. ശുചീകരണത്തിനിടെ കണ്ടെത്തിയത് അടിഞ്ഞ് കുടിയ പ്ലാസ്റ്റിക് മാലിന്യ കൂമ്പാരം.
മാനന്തവാടി നഗരസഭയിലെ ചെറ്റപ്പാലം തോടാണ് 20, 21 ഡിവിഷനിലെ 22ഓളം തൊഴിലാളികള്‍ തൊഴിലുറപ്പില്‍ ഉള്‍പ്പെടുത്തി ശുചീകരിച്ചത്. ചെന്നലായിയില്‍ നിന്നാരംഭിച്ച് കബനിയില്‍ ചേരുന്ന ഈ തോട് നിരവധി കര്‍ഷകരുടെ ഏക ആശ്രയം കൂടിയാണ്. ഏക്കര്‍ കണക്കിന് കൃഷിയാണ് തോടിന് അരികിലായി ഉള്ളത്.
അനവധി കുടുംബങ്ങളുടെ ജലസ്രോതസ്സും കൂടിയാണ് തോട്. തോടിന്റെ കരയില്‍ ഇടതൂര്‍ന്ന് ഒരാള്‍ വലിപ്പത്തില്‍ വളര്‍ന്ന് നില്‍ക്കുന്ന പുല്ലും മറ്റ് ചെടികളും തൊഴിലാളികള്‍ വെട്ടി മാറ്റി. ഇതിനിടയില്‍ വിഷമുള്ള പാമ്പിനെ കണ്ടെത്തിയത് തൊഴിലാളികളെ ഭീതിയിലാക്കി. തോടില്‍ കാട്മൂടി കിടന്ന ഭാഗങ്ങള്‍ ശുചീകരിച്ചപ്പോഴാണ് പ്ലാസ്റ്റിക് മാലിന്യങ്ങള്‍ കണ്ടെത്തിയത്. വര്‍ഷങ്ങളായി കെട്ടികിടക്കുന്ന മാലിന്യമാണ് തോട്ടില്‍ ഉണ്ടായിരുന്നത്. പലയിടങ്ങളില്‍ നിന്നായി ഒഴുകി വന്ന പ്ലാസ്റ്റിക് കുപ്പികളാണ് തോട്ടില്‍ അടിഞ്ഞ് കൂടിയത്. സൂസി കുര്യാക്കോസ്, റെജീന റഹീം, തങ്കമണി, മാതിയോഗി എന്നിവരുടെ നേതൃത്വത്തിലായിരുന്നു നവീകരണ പ്രവര്‍ത്തികള്‍.