മൈസൂരു: കര്‍ണാടകയില്‍ ചാമരാജ്‌നഗറില്‍ പുതിയ ക്ഷേത്രത്തിനുള്ള നിര്‍മാണ ചടങ്ങിനോടനുബന്ധിച്ച് ഭക്തര്‍ക്കുനല്‍കിയ പ്രസാദം കഴിച്ച് 11 പേര്‍ മരിക്കാനിടയായ സംഭവത്തില്‍ മൂന്നുപേരെ പൊലിസ് അറസ്റ്റ് ചെയ്തു.
ക്ഷേത്ര കമ്മിറ്റി അംഗങ്ങളായ മൂന്നുപേരാണ് അറസ്റ്റിലായത്. സുലിവഡി ഗ്രാമത്തില്‍ നിര്‍മിക്കുന്ന മാരാമ്മ ക്ഷേത്ര നിര്‍മാണത്തിനുള്ള തറക്കല്ലിടല്‍ ചടങ്ങില്‍ പ്രസാദം കഴിച്ചവരാണ് മരിച്ചത്. ഭക്ഷ്യവിഷബാധയേറ്റവരില്‍ 130 പേര്‍ ചാമരാജ്‌നഗര്‍ ജില്ലയിലെ വിവിധ ആശുപത്രികളില്‍ ചികിത്സയിലാണ്. ഇവരില്‍ എട്ടുപേരുടെ നില അതീവഗുരുതരമാണ്. പ്രസാദത്തില്‍ വിഷം അടങ്ങിയിട്ടുണ്ടെന്ന് കണ്ടെത്തിയിട്ടുണ്ട്.
പ്രസാദം കഴിച്ചയുടന്‍ ഭക്തര്‍ക്ക് ഛര്‍ദ്ദിയും വയറുവേദനയും അനുഭവപ്പെടുകയായിരുന്നു. പ്രസാദത്തിന്റെ സാമ്പിള്‍ വിദഗ്ധ പരിശോധനക്കായി ലാബിലേക്ക് അയച്ചു. പ്രസാദത്തില്‍ മാരകവിഷം ചേര്‍ത്തതായി സംശയിക്കുന്നുണ്ടെന്ന് ജില്ലാ ഹെല്‍ത്ത് ഓഫിസര്‍ അറിയിച്ചു.
ഭക്തര്‍ക്ക് പ്രസാദം നല്‍കുമ്പോള്‍തന്നെ ഇതിന് മണ്ണെണ്ണയുടെ ഗന്ധം ഉണ്ടായിരുന്നുവെന്ന് ചടങ്ങിനെത്തിയ ഒരാള്‍ പറഞ്ഞു. ഇലകളും മറ്റുമുള്ളതുകൊണ്ടാണ് ഇത്തരത്തിലുള്ള മണത്തിന് കാരണമെന്നായിരുന്നു മാനേജ്‌മെന്റ് പ്രതിനിധികള്‍ പറഞ്ഞിരുന്നത്. അസുഖബാധിതരെയെല്ലാം ഉടനെ ആശുപത്രിയിലെത്തിച്ചെങ്കിലും 11 പേര്‍ അപ്പോഴേക്കും മരിച്ചിരുന്നതായി പൊലിസ് അറിയിച്ചു.