കോവളം:  നാടോടി സ്ത്രീകളെ ആക്രമിച്ച് പണം തട്ടാനും  ശാരീരികമായി  ഉപദ്രവിക്കാനും ശ്രമിച്ച സംഘത്തെ തടയാനെത്തിയ പൊലീസുകാരന്  മര്‍ദനത്തില്‍ പരുക്ക്.
സംഭവവുമായി ബന്ധപെട്ട് കോട്ടപ്പുറം തുപ്പാശ്ശിക്കുടി സ്വദേശികളായ ജോയിസ് (19), രാജന്‍ (22), ജസ്റ്റസ്(22) എന്നിവരെ പിടികൂടി. ബാക്കിയുള്ളവര്‍ ഓടി രക്ഷപ്പെട്ടു. പരുക്കേറ്റ ശ്യാം കുമാര്‍ എന്ന പൊലീസുകാരന്‍ വിഴിഞ്ഞം സര്‍ക്കാര്‍ ആശുപത്രിയില്‍ ചികിത്സ തേടി.
ഇന്നലെ വെളുപ്പിന് രണ്ട് മണിയോടെയായിരുന്നു  സംഭവം. വിഴിഞ്ഞം കടപ്പുറത്ത് നോമാന്‍സ് ലാന്റിന് സമീപം ഉറങ്ങിക്കിടക്കുകയായിരുന്ന നാടോടി സ്ത്രീകള്‍ക്ക് നേരെയായിരുന്നു മൂന്നംഗ സംഘത്തിന്റെ ആക്രമണം. ആക്രമണത്തെ തുടര്‍ന്ന് ഭയന്ന സ്ത്രീകള്‍ സമീപത്ത് ഡ്യൂട്ടിയിലുണ്ടായിരുന്ന ശ്യാംകുമാറിനെ വിവരമറിയിച്ചു. തുടര്‍ന്ന് യുവാക്കളെ തടഞ്ഞ ശ്യാംകുമാറിനെ യുവാക്കളും ഇവര്‍ വിളിച്ചുവരുത്തിയ മറ്റൊരുസംഘവും ചേര്‍ന്ന് മര്‍ദിക്കുകയും തടിക്കഷണം എടുത്ത് തലക്കടിച്ച് പരുക്കേല്‍പ്പിക്കുകയുമായിരുന്നെന്ന് വിഴിഞ്ഞം എസ്.ഐ രതീഷ് പറഞ്ഞു. സംഭവമറിഞ്ഞ് സ്ഥലത്തെത്തിയ വിഴിഞ്ഞം പൊലീസ് പിടിയിലായവര്‍ക്കും കണ്ടാലറിയാവുന്ന മറ്റ് പത്ത്‌പേര്‍ക്കുമെതിരെ  കേസെടുത്തു.