മേപ്പാടി: ഇരുന്നൂറിലധികം കുടുംബങ്ങള്‍ താമസിക്കുന്ന ചൂരല്‍മല സെന്റിനല്‍ റോക്ക് എസ്റ്റേറ്റിലെ പാടികളിലേക്ക് കുടിവെള്ളം എത്തിക്കുന്നത് വൃത്തിഹീനമായ കുളത്തില്‍ നിന്നാണെന്ന് പരാതി. നിരവധി തവണ പരാതിപ്പെട്ടിട്ടും വെള്ളമെടുക്കുന്ന കുളവും പരിസരങ്ങളും വൃത്തിയാക്കാന്‍ കമ്പനി അധികൃതര്‍ തയ്യാറാവാത്തതാണ് പ്രതിസന്ധിക്ക് കാരണം.
 യാതൊരുവിധ ശുദ്ധീകരണവും നടത്താതെയാണ് എസ്റ്റേറ്റ് പാടികളിലേക്ക് വെള്ളം വിതരണം ചെയ്യുന്നത്. മഴ ലഭിക്കുന്നതിനാല്‍ നിലവില്‍ മുണ്ടക്കൈയില്‍ നിന്നുമുള്ള ജലമാണ് വിതരണം ചെയ്യുന്നത്. എന്നാല്‍ പൈപ്പ്‌ലൈനില്‍ തകരാര്‍ സംഭവിച്ചാല്‍ പിന്നീട് ചൂരല്‍മല എട്ടാം നമ്പറിനടുത്ത ചെറുകുളത്തില്‍ നിന്നുള്ള വെള്ളമാണ് വിതരണം ചെയ്യുക.
വേനലില്‍ പൂര്‍ണമായും ഈ കുളത്തിലെ വെള്ളമാണ് ഏക ആശ്രയം. കുളം വൃത്തിയാക്കാനോ കുടിവെള്ളത്തിന് മറ്റ് സംവിധാനം കണ്ടെത്താനോ തൊഴിലാളികള്‍ നിരന്തരം ആവശ്യപ്പെട്ടിട്ടും കമ്പനി അധികൃതര്‍ തയാറാവുന്നില്ലെന്ന് നാട്ടുകാര്‍ പറയുന്നു.  കുളത്തില്‍ വെള്ളം കുറയുമ്പോള്‍ ഇതിന്റെ സമീപത്തുള്ള വൃത്തിഹീനമായ തോട്ടിലെ വെള്ളം കുളത്തിലേക്ക് തിരിച്ച് വിട്ടാണ് എസ്റ്റേറ്റ് പാടികളിലേക്ക് കുടിവെള്ളം എത്തിക്കുന്നത്. കന്നുകാലികള്‍ മേയുന്ന പ്രദേശങ്ങളില്‍ നിന്നും മലിന്യം ഒഴുകി ഈ കുളത്തില്‍ എത്തിച്ചേരുന്നുണ്ട്.
മാലിന്യം കലര്‍ന്ന് നിറം മാറിയ രൂപത്തിലാണ് വെള്ളം പാടികളിലെത്തിയിരുന്നത്. ഈ കുളത്തില്‍ നിന്ന് പാടികളിലേക്ക് വെള്ളം പമ്പ് ചെയ്ത് എത്തിക്കാന്‍ ഒരുങ്ങുകയാണ് കമ്പനി അധികൃതര്‍.
കുടിവെള്ളക്ഷാമം രൂക്ഷമാകുന്നതിന് മുന്‍പ് കുളം വൃത്തിയാക്കുകയോ അല്ലെങ്കില്‍ ശുദ്ധജലത്തിന് മറ്റെന്തെങ്കിലും വഴി കണ്ടെത്തുകയോ ചെയ്യണമെന്നാണ് നാട്ടുകാര്‍ ആവശ്യപ്പെടുന്നത്.