ഡോര്‍ട്മുണ്ട്: ജര്‍മന്‍ ബുണ്ടസ് ലീഗ സീസണിന് മുന്നോടിയായുള്ള ജര്‍മന്‍ സൂപ്പര്‍ കപ്പ് പോരാട്ടത്തില്‍ ബൊറൂസിയ ഡോര്‍ട്മുണ്ടിനെ വീഴ്ത്തി ബയേണ്‍ മ്യൂണിക്ക് കിരീടം നേടി. നിശ്ചിത സമയത്ത് മത്സരം 2-2ന് സമനിലയില്‍ അവസാനിച്ചപ്പോള്‍ പെനാല്‍റ്റി ഷൂട്ടൗട്ടില്‍ 5-4ന് വിജയിച്ചാണ് ബയേണ്‍ ആറാം തവണയും കിരീടത്തില്‍ മുത്തമിട്ടത്. ഇതോടെ ഈ ട്രോഫി ഏറ്റവും കൂടുതല്‍ സ്വന്തമാക്കുന്ന ടീമായും ബയേണ്‍ മാറി.
കഴിഞ്ഞ തവണയും ബൊറൂസിയയെ കീഴടക്കി കിരീടം നേടിയ ബയേണ്‍ ചാംപ്യന്‍പട്ടം നിലനിര്‍ത്തുകയും ചെയ്തു. പ്രീസീസണിലെ മോശം ഫോം മായ്ച്ചു കളഞ്ഞ് ബുണ്ടസ് ലീഗയുടെ പുതിയ സീസണിന് ആത്മവിശ്വാസത്തോടെ ഇറങ്ങാന്‍ വിജയം ബാവേറിയന്‍സിന് തുണയാകും.