മക്ക: ഹാജിമാര്‍ക്കും സഹായികള്‍ക്കും ഏറെ സഹായകരമായി ഇന്ത്യന്‍ ഹജ്ജ് മിഷന്‍ പുറത്തിറക്കിയ ഹജ്ജ് ആപ്ലിക്കേഷന്‍. 'ഇന്ത്യന്‍ ഹാജി ഇന്‍ഫര്‍മേഷന്‍ സിസ്റ്റം' എന്ന പേരിലുള്ള ആപ് ആന്‍ഡ്രോയിഡ് അടക്കം എല്ലാതരം സ്മാര്‍ട്ട് മൊബൈലുകളിലും ഉപയോഗിക്കാന്‍ കഴിയുന്നതാണ്.
സംസ്ഥാന കോഡും അഞ്ചക്ക കവര്‍ നമ്പറോ, പാസ്‌പോര്‍ട്ട് നമ്പറോ നല്‍കിയാല്‍ ഹജ്ജ് വഴിയോ സ്വകാര്യ ഹജ്ജ് ഗ്രൂപ്പ് വഴിയോ ഇന്ത്യയില്‍ നിന്ന് ഹജ്ജിനെത്തിയ ഓരോ ഹാജിയുടെയും മക്കയിലെയും മദീനയിലേയും പൂര്‍ണ വിവരങ്ങള്‍ ലഭിക്കുന്നതാണ് ആപ്. ഇതിനാല്‍ തന്നെ തീര്‍ഥാടകര്‍ക്കും സഹായികള്‍ക്കും ഇത് ഏറെ പ്രയോജനകരമാണ്.
ഹാജിയുടെ പേര്, രജിസ്റ്റര്‍ ചെയ്ത മൊബൈല്‍ നമ്പര്‍, മക്കയിലെയും മദീനയിലെയും കെട്ടിട നമ്പര്‍, റൂം നമ്പര്‍, സ്ഥല വിവരം, ഹാജിയോടൊപ്പം എത്തിയ സഹായിയുടെ നമ്പര്‍, ഹാജിമാരുടെ വിമാന വിവരങ്ങള്‍, കൂടെയുള്ള ഹാജിമാരുടെ പേരും നമ്പറും എന്നിവ ഇതിലൂടെ അറിയാന്‍ കഴിയും. ഇവ കൂടാതെ അടുത്തുള്ള ആശുപത്രികള്‍, ഫാര്‍മസി, പള്ളി, റസ്റ്റോറന്റ്, ഷോപ്പിങ് മാള്‍ എന്നിവയും അറിയാന്‍ കഴിയാവുന്നതാണ്.