തലശ്ശേരി: മുഴപ്പിലങ്ങാട് ടോള്‍ ബൂത്തിനകത്തേക്ക് കണ്ടെയ്‌നര്‍ ലോറി ഇടിച്ചു കയറി ജീവനക്കാരന്‍ മരിച്ച സംഭവത്തില്‍ ലോറി ഡ്രൈവറെ പൊലിസ് അറസ്റ്റു ചെയ്തു. ചേര്‍ത്തല തുറവൂര്‍ സ്വദേശി ഷാനി(29)നെയാണ് എടക്കാട് പൊലിസ് അറസ്റ്റു ചെയ്തത്. മനപൂര്‍വമല്ലാത്ത നരഹത്യക്കാണ് കേസെടുത്തിട്ടുള്ളത്. അപകടത്തില്‍ മരിച്ച സഹദേവന്റെ മൃതദേഹം ഉച്ചയ്ക്ക് മയ്യില്‍ നാറാത്ത് ഓണപ്പറമ്പിലുള്ള സ്വവസതിയില്‍ പൊതുദര്‍ശനത്തിന് വച്ചു. കെ.പി.സി.സി ജനറല്‍ സെക്രട്ടറിമാരായ പി രാമകൃഷ്ണന്‍, സതീശന്‍ പാച്ചേനി, കെ സുരേന്ദ്രന്‍ തുടങ്ങിയവര്‍ അന്തിമോപചാരം അര്‍പ്പിച്ചു. വൈകുന്നേരം മൂന്നോടെ പയ്യാമ്പലം പൊതുശ്മശാനത്തില്‍ മൃതദേഹം സംസ്‌കരിച്ചു.