വൈത്തിരി: തേയില ഫാക്ടറില്‍ തീപിടിത്തം. തളിമലയില്‍ സ്ഥിതി ചെയ്യുന്ന ആയിഷാ പ്ലാന്റേഷന്റെ ഉടമസ്ഥതയിലുള്ള തെയില ഫാക്ടറിയിലാണ് ഇന്നലെ പുലര്‍ച്ചെ നാലോടെ തീ പിടിത്തമുണ്ടായത്. തൊഴിലാളികളാണ് തീ പടരുന്നത് ആദ്യം കണ്ടത്. ഇതേ തുടര്‍ന്ന് ഇരുപതോളം തൊഴിലാളികള്‍ ചേര്‍ന്ന് തീ അണക്കാന്‍ ശ്രമിച്ചെങ്കിലും നിയന്ത്രണ വിധേയമായില്ല. കൂടാതെ ഉണക്കാനിട്ടിരുന്ന തെയില ചപ്പിനുള്‍പ്പെടെ തീ പിടിക്കുകയായിരുന്നു. വിവരമറിഞ്ഞ് കല്‍പ്പറ്റയില്‍ നിന്നും രണ്ട് യൂനിറ്റ് ഫയര്‍ഫോഴ്‌സും പൊലിസും സ്ഥലത്തെത്തി തീയണക്കാന്‍ ശ്രമം തുടങ്ങി. ഏറെ നേരത്തെ പരിശ്രമത്തിനൊടുവിലാണ് ആളി പടര്‍ന്ന തീ നിയന്ത്രണ വിധേയമായത്. ഷോര്‍ട് സര്‍ക്യൂട്ടാണ് തീ പിടിത്തത്തിന് കാരണമെന്നാണ് പ്രാഥമിക നിഗമനം. സംഭവത്തില്‍ ആര്‍ക്കും പരുക്കില്ല. തൊഴിലാകള്‍ ഇടപെട്ട് പൊടിച്ചു വെച്ചിരുന്ന തേയില ഉടന്‍ തന്നെ നീക്കിയതിനാല്‍ വന്‍ നാശനഷ്ടം ഒഴിവായി. ലക്ഷങ്ങളുടെ നഷ്ടം സംഭവിച്ചതായാണ് നിഗമനം.