പാല: സിസ്റ്റര്‍ അമല കൊലക്കേസിലെ പ്രതിയായ സതീഷ് ബാബു(38) കുറ്റക്കാരനെന്ന് കോടതി. പാലാ ഡിസ്ട്രിക്ട് അഡീഷണല്‍ സെഷന്‍സ് കോടതിയുടേതാണ് വിധി. ഇയാള്‍ക്കുള്ള ശിക്ഷ വ്യാഴാഴ്ച്ച വിധിക്കും.

അറുപത്തിയഞ്ച് സാക്ഷികളെ വിസ്തരിച്ച കേസില്‍ 87 പ്രമാണങ്ങളും 24 തൊണ്ടിമുതലുകളും ഹാജരാക്കിയിരുന്നു. തെളിവുകളുടെയും പ്രമാണങ്ങളുടെയും തൊണ്ടിമുതലുകളുടെയും അടിസ്ഥാനത്തില്‍ പ്രതി കുറ്റക്കാരനാണെന്ന് സ്‌പെഷ്യല്‍ പബ്ലിക് പ്രോസിക്യൂട്ടര്‍ ജോര്‍ജ് ബോബന്‍ കോടതിയില്‍ വാദിച്ചു.

2015 സെപ്റ്റംബര്‍ 16ന് അര്‍ധരാത്രിക്കുശേഷമാണ് സിസ്റ്റര്‍ അമല കൊലചെയ്യപ്പെട്ടത്. മഠത്തില്‍ അതിക്രമിച്ചു കയറിയ പ്രതി കൈതൂമ്പകൊണ്ട് തലയ്ക്കടിച്ചു കൊലപ്പെടുത്തിയെന്നാണ് കേസ്. നിലവില്‍ മറ്റൊരു കേസില്‍ ശിക്ഷിക്കപ്പെട്ട് പ്രതി ഇപ്പോള്‍ സെന്‍ട്രല്‍ ജയിലിലാണ്.