കൈക്കൂലി വാങ്ങല്‍ ശിക്ഷാര്‍ഹമാണ്. എന്നാല്‍, ശമ്പളാടിസ്ഥാനത്തില്‍ ജോലി ചെയ്യുന്ന ഉദ്യോഗസ്ഥര്‍ക്ക്, കാര്യം നടക്കാന്‍വേണ്ടി പൈസകൊടുത്തു വശീകരിക്കുന്നവരെയാണ് ആദ്യം ശിക്ഷിക്കേണ്ടത്. കാരണം, ഇത്തരക്കാരാണു കൈക്കൂലിക്കാരെ വെള്ളവും വളവും കൊടുത്തു വളര്‍ത്തുന്നത്.
സ്വന്തം പണമാണല്ലോ കൊടുക്കുന്നത് എന്ന ചോദ്യം ന്യായമല്ല. ആവശ്യപ്പെടുന്നതിനു മുമ്പുതന്നെ പണമെറിഞ്ഞ് ഉദ്യോഗസ്ഥരെ കൈക്കലാക്കി കാര്യം നേടിയെടുക്കുന്നവര്‍ കൈക്കൂലി കിട്ടിയാല്‍ മാത്രം കാര്യങ്ങള്‍ നിര്‍വഹിക്കുന്ന ജീവിയെയാണു സൃഷ്ടിക്കുന്നത്. ഇതു സാമ്പത്തികമായി പിന്നാക്കം നില്‍ക്കുന്ന ജനവിഭാഗത്തെ ചെറിയതോതിലല്ല ബുദ്ധിമുട്ടിക്കുന്നത്.
ഒരു പ്രശ്‌നവുമില്ലെങ്കിലും പാസ്‌പോര്‍ട്ട് എന്‍ക്വയറിക്കും മറ്റും പൊലിസ് വരുമ്പോള്‍ അവര്‍ക്കു കൊടുക്കാന്‍ മുമ്പേതന്നെ പൈസ കരുതിവയ്ക്കുന്ന വിഭാഗം ഇന്നു കൂടുതലാണ്. ഉദ്യോഗസ്ഥര്‍ ജോലി ചെയ്യുന്നതിനു സര്‍ക്കാര്‍ ശമ്പളം കൊടുക്കുന്നുണ്ട്.
അതു ജനത്തിന് അറിയാത്തതല്ലല്ലോ. 'കൈക്കൂലി ശിക്ഷാര്‍ഹമാണ് 'എന്ന മുന്നറിയിപ്പു സര്‍ക്കാര്‍സ്ഥാപനങ്ങളിലെല്ലാം വയ്ക്കുന്നത് കൈക്കൂലിക്കു ചെറുതായെങ്കിലും നിയന്ത്രണം വരുത്താന്‍ സഹായിക്കും.