ജറൂസലം: ഇസ്‌റാഈലിലെ അല്‍ജസീറയുടെ ഓഫിസുകള്‍ അടച്ചുപൂട്ടാന്‍ തീരുമാനം. അല്‍ജസീറ തീവ്രവാദ പ്രവര്‍ത്തനങ്ങള്‍ക്കു പ്രേരണ നല്‍കുന്നുവെന്ന പ്രധാനമന്ത്രി ബിന്‍യാമിന്‍ നെതന്യാഹുവിന്റെ ആരോപണത്തിനു പിറകെയാണു തീരുമാനം. ബൈതുല്‍ മുഖദ്ദസിലുണ്ടായ അക്രമ സംഭവങ്ങള്‍ക്കു പിന്നാലെ അല്‍ജസീറയെ രാജ്യത്തുനിന്നു പുറത്താക്കണമെന്ന് നെതന്യാഹു പറഞ്ഞിരുന്നു.
ഐ.എസ്, ഹമാസ്, ഹിസ്ബുല്ല, ഇറാന്‍ എന്നിവയുടെ പ്രധാന ആയുധമായി അല്‍ജസീറ മാറിയിരിക്കുകയാണെന്ന് ഇസ്‌റാഈല്‍ വാര്‍ത്താ വിനിമയ മന്ത്രി അയൂബ് കാറ വാര്‍ത്താസമ്മേളനത്തില്‍ പറഞ്ഞു. മാധ്യമ പ്രവര്‍ത്തകരുടെ അംഗീകാരം എടുത്തുകളയുമെന്നും ചാനലിന്റെ കേബിള്‍, സാറ്റലൈറ്റ് ബന്ധങ്ങള്‍ വിഛേദിക്കുമെന്നും വാര്‍ത്താ വിനിമയ മന്ത്രി പറഞ്ഞു.