പെരിന്തല്‍മണ്ണ: ഉപയോഗശൂന്യമായ കിണര്‍ നവീകരിക്കുന്നതിനിടെ മനുഷ്യ അസ്ഥികൂടം കണ്ടെത്തി. പെരിന്തല്‍മണ്ണ ഫയര്‍‌സ്റ്റേഷനു സമീപം സ്വകാര്യവ്യക്തിയുടെ സ്ഥലത്താണ് തലയോട്ടിയും മനുഷ്യ ശരീരത്തിന്റെ മറ്റ് അസ്ഥികളും കണ്ടെത്തിയത്.
ഇന്നലെ രാവിലെ പത്തോടെ പഴയ കിണറിന്റെ പുനര്‍നിര്‍മാണ പ്രവൃത്തികള്‍ നടത്തുമ്പോഴാണ് തൊഴിലാളികള്‍ക്കു ചെളിയില്‍നിന്നു പഴക്കംചെന്ന മനുഷ്യ അസ്ഥികൂടം ലഭിച്ചത്. പെരിന്തല്‍മണ്ണ പൊലിസും ഫോറന്‍സിക് വിഭാഗവും സ്ഥലത്തെത്തി പരിശോധന നടത്തി. വിദഗ്ധ പരിശോധനയ്ക്കായി തലയോട്ടിയും അസ്ഥികളും മഞ്ചേരി ഫോറന്‍സിക് വിഭാഗത്തിനു കൈമാറിയിട്ടുണ്ട്.