നിലമ്പൂര്‍: രണ്ടര കിലോഗ്രാം കഞ്ചാവുമായി നിലമ്പൂരില്‍ യുവാവ് എക്‌സൈസ് സംഘത്തിന്റെ പിടിയിലായി. എടവണ്ണ പത്തപ്പിരിയം തങ്കയത്ത് വീട്ടില്‍ റിയാസ് ബാബു (36) വാണ് പിടിയിലായത്. ക്രിസ്തുമസ്-പുതുവത്സരം അനുബന്ധിച്ചു നടത്തിയ പ്രത്യേക പരിശോധനയുടെ ഭാഗമായാണ് ഇയാള്‍ പിടിയിലായത്. നേരത്തെ കഞ്ചാവ് കടത്തിയതിന് പിടിയിലായി ജാമ്യത്തിലിറങ്ങിയാണ് വീണ്ടും കഞ്ചാവ് വില്‍പന നടത്തിയതെന്ന് എക്‌സൈസ് സംഘം പറഞ്ഞു. രഹസ്യവിവരത്തെ തുടര്‍ന്നു പിന്തുടര്‍ന്ന് മില്‍മ പ്ലാന്റിനു സമീപംവച്ചാണ് ഇന്നലെ ഇയാളെ പിടികൂടിയത്. ഓട്ടോറിക്ഷയിലാണ് കഞ്ചാവ് സൂക്ഷിച്ചിരുന്നത്. ഓട്ടോറിക്ഷയും കസ്റ്റഡിയിലെടുത്തു. എക്‌സൈസ് ഇന്‍സ്‌പെക്ടര്‍ കെ.ടി സജിമോന്റെ നേതൃത്വത്തില്‍ പ്രിവന്റീവ് ഓഫിസര്‍ റെജി തോമസ്, സിവില്‍ എക്‌സൈസ് ഓഫിസര്‍മാരായ കെ.ആര്‍ ജസ്റ്റിന്‍, സി.കെ റംഷുദ്ദീന്‍, അബ്ദുല്‍ റഷീദ്, വി. സുഭാഷ്, സനീറ തുടങ്ങിയവരാണ് പ്രതിയെ പിടികൂടിയത്. പ്രതിയെ കോടതിയില്‍ ഹാജരാക്കി.