പാനൂര്‍: വാഹനം തകര്‍ത്തതിനു പിന്നാലെ യൂത്ത് കോണ്‍ഗ്രസ് നേതാവിന്റെ വീടിനു നേരെയും അക്രമം. യൂത്ത് കോണ്‍ഗ്രസ് കൂത്തുപറമ്പ് മണ്ഡലം സെക്രട്ടറി ചെണ്ടയാട് മാവിലേരിയിലെ തേജസ് മുകുന്ദിന്റെ വീടിനു നേരെയാണ് ചൊവ്വാഴ്ച രാത്രി 11ഓടെ അക്രമമുണ്ടായത്. ജനല്‍ചില്ലുകള്‍ എറിഞ്ഞു തകര്‍ത്തു. വീട്ടുകാര്‍ ഉറങ്ങാനൊരുങ്ങുന്നതിനിടെയാണ് ഒരു സംഘം കല്ലെറിഞ്ഞത്. സംഭവത്തില്‍ നാല് സി.പി.എം പ്രവര്‍ത്തകരെ പാനൂര്‍ പൊലിസ് അറസ്റ്റ് ചെയ്തു. മാവിലേരിയിലെ തൈവെച്ചതില്‍ സനീഷ്(24), തൈവെച്ചതില്‍ നിയന്ത്(21), കാട്ടപ്പയില്‍ വിജില്‍ദാസ്(25), പാലപ്പറമ്പത്ത് സ്മൃതിന്‍ രാജ്(22 ) എന്നിവരെയാണ് എസ്.ഐ ടി.വി സുരേഷ് ബാബു അറസ്റ്റ് ചെയ്തത്. വീടിന് പൊലിസ് കാവലേര്‍പ്പെടുത്തി. തിങ്കളാഴ്ച രാത്രി തേജസ് മുകുന്ദിന്റെ വീട്ടുമുറ്റത്ത് നിര്‍ത്തിയിട്ടിരുന്ന കാര്‍ ആക്രമിച്ചിരുന്നു. ഇതിനെതിരേ മാവിലേരിയില്‍ പ്രതിഷേധയോഗം കഴിഞ്ഞ് ഏതാനും മണിക്കൂറുകള്‍ക്ക് ശേഷമാണ് വീടിന് നേരെ അക്രമമുണ്ടായത്.