കല്ലമ്പലം: കൊളുത്ത് ഒടിഞ്ഞതുമൂലം മിനിലോറിയുടെ പിറകില്‍ ഘടിപ്പിച്ചിരുന്ന കോണ്‍ക്രീറ്റ് മിക്‌സര്‍ യന്ത്രം വാഹനവുമായുള്ള ബന്ധം വേര്‍പെട്ട് റോഡില്‍ മറിഞ്ഞു. വാഹനം അന്‍പത് മീറ്ററോളം ഓടിയ ശേഷമാണ് നിന്നത്. തൊട്ടു പിറകെ വാഹനങ്ങള്‍ ഇല്ലാതിരുന്നതിനാല്‍ വന്‍ ദുരന്തമാണ് ഒഴിവായത്.
ദേശീയ പാതയില്‍ കല്ലമ്പലതിനു സമീപം ഇന്നലെ വൈകിട്ട് അഞ്ചരയോടെയായിരുന്നു അപകടം . കല്ലമ്പലം പൊലിസും, ഹൈവേ പൊലിസും സ്ഥലത്തെത്തി ഗതാഗതം നിയന്ത്രിച്ചു. അരമണിക്കൂറിനുള്ളില്‍ ക്രയിന്‍ വരുത്തി മിക്‌സര്‍ മിഷ്യന്‍ ഉയര്‍ത്തി റോഡില്‍ നിന്ന് മാറ്റി കൊണ്ടുപോകുകയും ചെയ്തു. ചാത്തന്നൂര്‍ സ്വദേശിയുടെതാണ് മിക്‌സര്‍ യന്ത്രം. ഇത് കരാര്‍ തൊഴിലാളിക്ക് ദിവസ വാടകയ്ക്ക് നല്‍കിയിരിക്കുകയായിരുന്നു. അവിടെനിന്ന് തിരിച്ചു കൊണ്ടുപോകവെയാണ് അപകടം സംഭവിച്ചത്.