ആലപ്പുഴ: പുന്നപ്രയില്‍ പ്രവര്‍ത്തിക്കുന്ന മൈനോറിറ്റി കോച്ചിങ് സെന്റര്‍ മാറ്റി സ്ഥാപിക്കുന്ന വിഷയത്തില്‍ ജില്ലാ കലക്ടര്‍ സ്വീകരിച്ചിരിക്കുന്ന സമീപനം പ്രതിഷേധാര്‍ഹമാണെന്ന് മുസ്‌ലിംലീഗ് ജില്ലാ പ്രസിഡന്റ് എ.എം നസീര്‍ പറഞ്ഞു. നിലവില്‍ പ്രവര്‍ത്തിക്കുന്ന സ്ഥലത്ത്‌നിന്നു മാറ്റുന്ന സ്ഥാപനം കലക്ടറേറ്റ് കെട്ടിടത്തിന്റെ മുകളിലേക്ക് മാറ്റി സ്ഥാപിക്കാന്‍ ശ്രമങ്ങള്‍ നടന്നിട്ടും കലക്ടറുടെ നിഷേധാത്മക നിലപാട് ഇതിന് തടസം സൃഷ്ടിക്കുകയാണ്.
ഇത് അംഗീകരിക്കാന്‍ കഴിയില്ല. നൂറുക്കണക്കിന് ന്യൂനപക്ഷ സമുദായ അംഗങ്ങളായ വിദ്യാര്‍ഥികള്‍ക്ക് പ്രയോജനം ചെയ്യുന്ന സ്ഥാപനം കഴിഞ്ഞ യു.ഡി.എഫ് സര്‍ക്കാരിന്റെ കാലത്താണ് അനുവദിച്ചത്.
നിലവധി യുവതീയുവാക്കളെ സര്‍ക്കാര്‍ സര്‍വിസിലേക്ക് എത്തിക്കാന്‍ കോച്ചിങ് സെന്ററിന് ഇതിനോടകം കഴിഞ്ഞിട്ടുണ്ട്.
വിഷയത്തില്‍ ആലപ്പുഴയില്‍ നിന്നുള്ള മന്ത്രിമാരായ ജി. സുധാകരന്‍, തോമസ് ഐസക്ക് എന്നിവര്‍ നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.