തിരുവനന്തപുരം: വനിതാ കമ്മിഷനെതിരെ പരാമര്‍ശം നടത്തിയ പി.സി. ജോര്‍ജ് എം.എല്‍.എയ്ക്ക് താക്കീതുമായി കമ്മിഷന്‍ അധ്യക്ഷ എം. സി. ജോസഫൈന്‍. കമ്മിഷന് നേരെ വിരട്ടല്‍ വേണ്ടെന്ന് തുറന്നടിച്ച ജോസഫൈന്‍ സൗകര്യമുള്ളപ്പോള്‍ ഹാജരാകുമെന്ന തരത്തിലുള്ള പ്രസ്താവനകള്‍ പദവി മറന്നുള്ളതാണെന്നും കൂട്ടിച്ചേര്‍ത്തു.

കമ്മിഷനെ അപകീര്‍ത്തിപ്പെടുത്താന്‍ നോക്കിയാല്‍ അത് വിലപ്പോകില്ലെന്നും അവര്‍ പറഞ്ഞു.

ആക്രമിക്കപ്പെട്ട നടിയെക്കുറിച്ച് അപകീര്‍ത്തികരമായ പരാമര്‍ശം നടത്തിയതിന് കേസെടുക്കാനുള്ള വനിതാ കമ്മിഷന്‍ നീക്കത്തെയാണ് പി.സി ജോര്‍ജ് പരിഹസിച്ചത്. വനിതാ കമ്മിഷനെന്നു കേട്ടാല്‍ ഭയങ്കര പേടിയാണെന്നും അല്‍പ്പം ഉള്ളി കിട്ടിയാല്‍ കരയാമായിരുന്നെന്നും പരിഹാസരൂപേണ അദ്ദേഹം പ്രതികരിച്ചു. അവരാദ്യം വനിതകളുടെ കാര്യമാണു നോക്കേണ്ടതെന്നും നല്ല കാര്യങ്ങളൊക്കെ ചെയ്തിട്ടു വന്നാല്‍ താനും ഒപ്പം കൂടുമെന്നും പി.സി ജോര്‍ജ് പറഞ്ഞു.

പി.സി ജോര്‍ജ് എം.എല്‍.എക്കെതിരേ കേസെടുക്കാമെന്നും പ്രോസിക്യൂഷന്‍ നടപടികളിലേക്കു കടക്കാമെന്നും വനിതാ കമ്മിഷന്‍ ലോ ഓഫിസറും സ്റ്റാന്‍ഡിങ് കൗണ്‍സിലും നിയമോപദേശം നല്‍കിയിരുന്നു. ഇതിന്റെ അടിസ്ഥാനത്തിലാണ് ജോര്‍ജിനെതിരെ കമ്മിഷന്‍ കേസെടുത്തത്.