ന്യൂഡല്‍ഹി: രാജ്യത്തെ നോട്ട് നിരോധനം ഏറ്റവും കൂടുതല്‍ സമ്മര്‍ദ്ദത്തിലാക്കിയത് കശ്മിര്‍ ഭീകരരെയാണെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി. സാമ്പത്തിക രംഗത്ത് കടുത്ത സമ്മര്‍ദ്ദത്തിലാണ് ഇവരെന്നും അദ്ദേഹം വ്യക്തമാക്കി.
ജമ്മുകശ്മിരില്‍ അനധികൃത പ്രവര്‍ത്തനങ്ങള്‍ക്കായി വന്‍തോതില്‍ പണമാണ് ഭീകരര്‍ക്കായി എത്തുന്നത്. ഇതിന് തടയിടാന്‍ നോട്ട് നിരോധനം വഴി സഹായകമായതായി സ്വകാര്യ ടി.വി ചാനലിന് നല്‍കിയ അഭിമുഖത്തില്‍ ജെയ്റ്റ്‌ലി കൂട്ടിച്ചേര്‍ത്തു.
കശ്മിര്‍ താഴ്്‌വരയില്‍ ഭീകര പ്രവര്‍ത്തനം നടത്തി അസ്ഥിരമായ സാഹചര്യം സൃഷ്ടിക്കാമെന്നാണ് വിഘടനവാദികള്‍ കണക്കു കൂട്ടുന്നത്.
എന്നാല്‍ അവരുടെ ജീവിതം അടുത്ത കാലത്തായി വലിയ പ്രതിസന്ധിയിലാണ്. ഭീകരത തുടച്ചു നീക്കാന്‍ ശ്രമിക്കുന്ന കശ്മിര്‍ പൊലിസിന്റെ പ്രവര്‍ത്തനങ്ങളെ അദ്ദേഹം ശ്ലാഘിച്ചു.
രാജ്യം രണ്ടു ഭീഷണികളെയാണ് ഇന്ന് നേരിടുന്നത്. ഇതിലൊന്ന് ജമ്മുകശ്മിരില്‍ ഭീകരര്‍ നടത്തുന്ന അക്രമങ്ങളാണ്. അതിര്‍ത്തി കടുന്നുള്ള ഭീകരത രാജ്യത്തിന് വലിയ വെല്ലുവിളിയാണ് ഉണ്ടാക്കുന്നത്. രണ്ടാമത്തേത് വിവിധ സംസ്ഥാനങ്ങളിലെ മാവോവാദി സംഘങ്ങള്‍ ഉയര്‍ത്തുന്ന വെല്ലുവിളിയാണ്.
സ്വാതന്ത്ര്യത്തിനു ശേഷം ഒരിക്കല്‍ പോലും കശ്മിര്‍ ഇന്ത്യയുടെ ഭാഗമാണെന്ന് സമ്മതിക്കാന്‍ പാകിസ്താന്‍ തയാറായിട്ടില്ല. കശ്മിര്‍ അവരുടെ പൂര്‍ത്തീകരിക്കാത്ത അജണ്ടയാണ്. അവര്‍ ഇന്ത്യയിലേക്ക് തുടര്‍ച്ചയായ ആക്രമണങ്ങളാണ് അഴിച്ചുവിടുന്നത്. 1965, 1971, യുദ്ധങ്ങളും പിന്നീടുണ്ടായ കാര്‍ഗില്‍ യുദ്ധവുമെല്ലാം ഇതാണ് തെളിയിക്കുന്നത്.
കശ്മിരില്‍ ഭീകരര്‍ക്ക് സാഹയകമാകുന്ന ചില നടപടികള്‍ ഉണ്ടാകുന്നുണ്ട്.
ഇവരെ രക്ഷപ്പെടാന്‍ സഹായിക്കുന്ന തരത്തില്‍ ജനങ്ങള്‍ സുരക്ഷാ സൈന്യത്തിനുനേരെ കല്ലേറ് നടത്തുന്നത് ഗുരുതരമായ അവസ്ഥയാണ് സംസ്ഥാനത്ത് ഉണ്ടാക്കുന്നത്.
ജനങ്ങള്‍ സൈന്യത്തിനുനേരെ കല്ലേറ് നടത്തുന്നതുകാരണം ഭീകരര്‍ക്ക് രക്ഷപ്പെടാനുള്ള സാഹചര്യമാണ് ഉണ്ടാക്കുന്നത്. ഭീകര പ്രവര്‍ത്തനങ്ങള്‍ക്ക് പണം ലഭിക്കാത്തതാണ് ബാങ്കുകള്‍ കൊള്ളയടിക്കാന്‍ ഭീകരരെ പ്രേരിപ്പിക്കുന്നതെന്നും അരുണ്‍ ജെയ്റ്റ്‌ലി പറഞ്ഞു.
എന്നാല്‍ സിക്കിം അതിര്‍ത്തിയില്‍ ഇന്ത്യ-ചൈന സൈന്യങ്ങള്‍ തമ്മില്‍ മുഖാമുഖം നിലകൊള്ളുന്നതുസംബന്ധിച്ച് എന്തെങ്കിലും പ്രതികരിക്കാന്‍ അദ്ദേഹം തയാറായില്ല.
നമ്മുടെ സുരക്ഷാ സേനയുടെ കാര്യത്തില്‍ രാജ്യത്തിന് പൂര്‍ണ വിശ്വാസമുണ്ടെന്നാണ് ഇതുസംബന്ധിച്ച ചോദ്യത്തോട് അദ്ദേഹം പ്രതികരിച്ചത്.