മലപ്പുറം: സ്വാതന്ത്ര്യദിനാഘോഷം മികവുറ്റതാക്കാന്‍ ജില്ലയില്‍ ഗംഭീര ഒരുക്കം. ജില്ലാതല പരിപാടി നടക്കുന്ന എം.എസ്.പി ഗ്രൗണ്ടില്‍ സേനാംഗങ്ങളുടെ അവസാന റിഹേഴ്‌സല്‍ ഇന്നലെ നടന്നു. മൂന്നു ദിവസങ്ങളിലായാണ് നാളെ നടക്കുന്ന പരേഡിനുള്ള റിഹേഴ്‌സല്‍ നടന്നത്. സ്വാന്ത്ര്യദിനാഘോഷ പരിപാടികളില്‍ മുഖ്യാതിഥിയായി പട്ടികജാതി-വര്‍ഗ, സാംസ്‌കാരിക വകുപ്പ് മന്ത്രി എ.കെ ബാലനാണ് പങ്കെടുക്കുന്നത്.
രാവിലെ എട്ടിന് എം.എസ്.പി ഗ്രൗണ്ടില്‍ നടക്കുന്ന വിവിധ പ്രാദേശിക സേനകളുടെ പരേഡില്‍ മന്ത്രി സല്യൂട്ട് സ്വീകരിച്ചു സ്വാതന്ത്ര്യദിന സന്ദേശം നല്‍കും. പരേഡിന് എം.എസ്.പി. അസിസ്റ്റന്റ് കമാന്‍ഡന്റ് സി.വി ശശി നേതൃത്വം നല്‍കും.
സായുധ പൊലിസിലെ ഇന്‍സ്‌പെക്ടര്‍ അജിത് കുമാര്‍ സെക്കന്‍ഡ്-ഇന്‍ കമാന്‍ഡന്റ് ആകും. നാളെ രാവിലെ 6.45നു മലപ്പുറം മുനിസിപ്പല്‍ പ്രദേശത്തെ സ്‌കൂളുകളെ പങ്കെടുപ്പിച്ചു സിവില്‍ സ്റ്റേഷന്‍ പരിസരത്തുനിന്നു പരേഡ് ഗ്രൗണ്ടിലേക്കു പ്രഭാത ഭേരി നടത്തും. പ്രഭാതഭേരിയില്‍ മികച്ച പ്രദര്‍ശനം നടത്തുന്ന സ്‌കൂളുകള്‍ക്കു ട്രോഫികള്‍ വിതരണം ചെയ്യും.

'ചൊങ്കാ'ക്കി സമ്മാനം നേടാം

മലപ്പുറം: സ്വാതന്ത്ര്യദിനാഘോഷത്തില്‍ പങ്കെടക്കുന്ന നഗരത്തിലെ കച്ചവടക്കാര്‍ക്കു ജില്ലാ ഭരണകൂടംവക സമ്മാനം. ആഘോഷത്തിന്റെ ഭാഗമായി നഗരത്തിലെ കച്ചവടസ്ഥാപനങ്ങള്‍ അലങ്കരിക്കണം. മികച്ച രീതിയില്‍ അലങ്കാരം നടത്തുന്ന സ്ഥാപനങ്ങള്‍ക്കാണ് സമ്മാനങ്ങള്‍ നല്‍ക്കുക. പരിപാടികളില്‍ ഗ്രീന്‍ പ്രോട്ടോകോള്‍ പാലിക്കണമെന്ന നിര്‍ദേശമുള്ളതിനാല്‍ ഇതു പാലിക്കുന്നവര്‍ക്കാകും സമ്മാനം ലഭിക്കുക.

വിദ്യാര്‍ഥികള്‍ക്കു യാത്രാ ആനൂകൂല്യം

മലപ്പുറം: നാളെ സ്വാതന്ത്ര്യദിനാഘോഷ പരിപാടികളില്‍ പങ്കെടുക്കാനെത്തുന്ന വിദ്യാര്‍ഥികള്‍ക്കു ബസുകളില്‍ യാത്രാ ആനൂകൂല്യം നല്‍കണമെന്ന് ആര്‍.ടി.ഒ അറിയിച്ചു.