മണ്ണാര്‍ക്കാട്: കാര്‍ഷിക രംഗത്തെ ഈവര്‍ഷത്തെ സംസ്ഥാനത്തെ മികച്ച സ്‌കൂള്‍ വിദ്യാര്‍ഥികള്‍ക്കുള്ള സംസ്ഥാന അവാര്‍ഡ് എടത്തനാട്ടുകര (നാലുകണ്ടം)പി.കെ.എച്ച്.എം.ഒ.യുപി സ്‌കൂളിലെ പി. അക്ഷയ്ക്ക് ലഭിച്ചു. സ്‌കൂള്‍ കാര്‍ഷിക ക്ലബ്ബിലൂടെ സ്‌കൂള്‍ വളപ്പിലും വീട്ടുമുറ്റത്തും കരനെല്‍കൃഷിയുള്‍പ്പെടെയുള്ള കൃഷികള്‍ പരിപാലിക്കുന്നതില്‍ മികച്ച പ്രവര്‍ത്തനം നടത്തിയതിനാണ് അവാര്‍ഡ്. പതിനായിരം രൂപയും സ്വര്‍ണ്ണ മെഡലും പ്രശംസാപത്രവും ഫലകവുമാണ് അവാര്‍ഡ്.
ജൈവപച്ചക്കറി കൃഷിയിലൂടെ മികച്ച വിളവ് നേടാനും ഈ എട്ടാം ക്ലാസുകാരനായി. എടത്തനാട്ടുകര കോയക്കുന്നിലെ ടാപ്പിങ് തൊഴിലാളിയായ പൂവ്വത്തിങ്ങല്‍ മുരളിയുടേയും സുമിത്രയുടേയും മകനാണ് അക്ഷയ്. കഴിഞ്ഞ മൂന്നു വര്‍ഷമായി സ്‌കൂളില്‍ പ്രവര്‍ത്തിക്കുന്ന മാതൃഭൂമി-സീഡ് ക്ലബ്ബ് അംഗമായി പ്രവര്‍ത്തിക്കുന്ന അക്ഷയ്, ഈ വര്‍ഷത്തെ മാതൃഭൂമി-സീഡ് പദ്ധതിയുടെ ജെംസ് ഓഫ് സീഡ് അവാര്‍ഡ്, കൃഷിവകുപ്പിന്റെ ജില്ലയിലെ മികച്ച വിദ്യാര്‍ഥി കര്‍ഷകന് അലനല്ലൂര്‍ ഗ്രാമപഞ്ചായത്തിന്റെ മികച്ച കുട്ടി കര്‍ഷകന്‍ എന്നീ അവാര്‍ഡുകള്‍ നേടിയിട്ടുണ്ട്.
അധ്യാപകരും സീഡ് കോഓര്‍ഡിനേറ്റര്‍മാരുമായ വി. റസാഖ്, പി. ഷാനിര്‍ ബാബു എന്നിവരാണ് സ്‌കൂളില്‍ പദ്ധതിക്ക് നേതൃത്വം വഹിക്കുന്നത്. 2012 മുതല്‍ ജില്ലയിലെ മികച്ചകാര്‍ഷിക പ്രവര്‍ത്തന വിദ്യാലയമാണ് നാലുകണ്ടം യു.പി സ്‌കൂള്‍. കൃഷി വകുപ്പിന്റെ ഈവര്‍ഷത്തെ മികച്ച വിദ്യാര്‍ഥി കര്‍ഷകനായി പി. അക്ഷയും സ്ഥാപന മേധാവിയായി എച്ച്.എം കെ.കെ. അബൂബക്കറും, കോ-ഓര്‍ഡിനേറ്ററായി അധ്യാപകന്‍ വി. റസാഖും തെരെഞ്ഞെടുക്കപ്പെട്ടിരുന്നു. ആഗസ്റ്റ് 16 ന് പാലക്കാട് നടക്കുന്ന സംസ്ഥാന കര്‍ഷക ദിനാചരണ ചടങ്ങില്‍ മുഖ്യമന്ത്രിയില്‍ നിന്ന് അക്ഷയ് അവാര്‍ഡ് ഏറ്റുവാങ്ങും.