കോഴിക്കോട്: ഗീത പ്രസ് പോലുള്ള ഫാസിസ്റ്റ് സങ്കേതങ്ങള്‍ വളരെക്കാലം മുന്‍പ് പ്രചരിപ്പിച്ച ആശയങ്ങളാണ് ഇപ്പോള്‍ നവ ഫാസിസ്റ്റുകളും ഉപയോഗിക്കുന്നതെന്ന് പ്രമുഖ എഴുത്തുകാരന്‍ അക്ഷയ് മുകുള്‍. ഫെസ്റ്റിവെല്‍ ഡെമോക്രസിയില്‍ സംസാരിക്കുകയായിരുന്നു അദ്ദേഹം. ഇന്ത്യ എങ്ങനെയായിരിക്കണമെന്ന് ഫാസിസ്റ്റുകള്‍ നേരത്തെ തീരുമാനിച്ചിട്ടുണ്ട്. ഗീത പ്രസിന്റെ കല്യാണ്‍ മാസികയില്‍ ഗാന്ധി ഉള്‍പ്പെടെയുള്ള ദേശീയ നേതാക്കളെല്ലാം ലേഖനങ്ങളെഴുതിയിരുന്നു. നെഹ്‌റു മാത്രമായിരുന്നു ഇതിനൊരപവാദം. സ്ത്രീകളും പശുവുമെല്ലാം അന്നും ഫാസിസത്തിന്റെ ചില ഉപാധികളായിരുന്നു. കടുത്ത മുസ്‌ലിം വിദ്വേഷം സ്ത്രീകളില്‍ കുത്തിവയ്ക്കുന്ന തരത്തിലുള്ള പ്രസിദ്ധീകരണങ്ങള്‍ അന്ന് ഗീത പ്രസ് വ്യാപിപ്പിച്ചിരുന്നു. സതി നിയമംകൊണ്ട് നിരോധിച്ചിട്ടും അതിനെ ന്യായീകരിക്കുകയാണ് അവര്‍ ചെയ്തതെന്നും അദ്ദേഹം പറഞ്ഞു.