ഇസ്‌ലാമാബാദ്: കശ്മിര്‍ പ്രശ്‌നം പരിഹരിക്കാന്‍ അന്താരാഷ്ട്ര സമൂഹം ഇടപെടണമെന്ന് പാക് പ്രധാനമന്ത്രി ശാഹിദ് ഖാഖാന്‍ അബ്ബാസി. 70ാമത് സ്വാതന്ത്ര്യദിനത്തില്‍ രാജ്യത്തെ അഭിസംബോധന ചെയ്യുകയായിരുന്നു അദ്ദേഹം. പരമാധികാരം സംരക്ഷിച്ചുകൊണ്ട് അയല്‍രാജ്യങ്ങളുമായി നല്ലബന്ധം തുടരാന്‍ ആഗ്രഹിക്കുന്നുവെന്ന്
അദ്ദേഹം പറഞ്ഞു.
നവാസ് ശരീഫ് പുറത്താക്കപ്പെട്ടതിനു ശേഷം ഇടക്കാല പ്രധാനമന്ത്രിയായി ചുമതലയേറ്റ ശേഷം ആദ്യമായാണ് അബ്ബാസി അയല്‍രാജ്യങ്ങളുമായുള്ള ബന്ധത്തെ കുറിച്ച് നിലപാട് പ്രഖ്യാപിക്കുന്നത്.
ലോകത്തെ എല്ലാ രാജ്യങ്ങളോടും പാകിസ്താന് ഇതേ നിലപാടാണുള്ളത്. അയല്‍ രാജ്യങ്ങളുമായുള്ള ബന്ധം പരമാധികാരത്തെ ബാധിക്കാത്ത വിധം മെച്ചപ്പെടുത്തും. പരമാധികാരം സംരക്ഷിച്ച് എന്ന വാക്ക് കശ്മിര്‍ വിഷയത്തില്‍ പാകിസ്താന്‍ മുന്‍ നിലപാട് തുടരുമെന്നതിന്റെ സൂചനയാണെന്ന് നിരീക്ഷകര്‍ വിലയിരുത്തുന്നു.
ദക്ഷിണേഷ്യയിലെ ജനങ്ങള്‍ കഴിഞ്ഞ 50 വര്‍ഷമായി സംഘര്‍ഷത്തിലാണ്. ഇത്തരം പ്രശ്‌നങ്ങള്‍ കാരണം അവരുടെ പുരോഗതിയും വളര്‍ച്ചയും തടസപ്പെട്ടു. മുന്‍ ഇന്ത്യന്‍ നാവിക സേനാ ഉദ്യോഗസ്ഥന്‍ കുല്‍ഭൂഷണ്‍ ജാദവിനെ തൂക്കിലേറ്റാന്‍ വിധിച്ചതും ഉറി, പത്താന്‍കോട്ട് ആക്രമണങ്ങളുമാണ് ഇന്ത്യയും പാകിസ്താനും തമ്മിലുള്ള ബന്ധം വഷളാക്കിയത്.