സ്വന്തം ലേഖകന്‍
നെടുമ്പാശ്ശേരി: സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ ഹജ്ജ് കര്‍മം നിര്‍വഹിക്കാന്‍ യാത്രയാകുന്ന ഗ്രീന്‍ കാറ്റഗറി തീര്‍ഥാടകരുടെ ആദ്യ സംഘം ഇന്ന് ക്യാംപിലെത്തും. നാളെ യാത്ര തിരിക്കുന്ന ഗ്രീന്‍ കാറ്റഗറിയിലുള്ള 600 പേരുടെ ആദ്യ സംഘമാണ് ഇന്ന് ക്യാംപിലെത്തുക. നാളെ നെടുമ്പാശ്ശേരിയില്‍ നിന്ന് രാവിലെ 7.15ന് പുറപ്പെടുന്ന ആദ്യ വിമാനത്തില്‍ അസീസിയ കാറ്റഗറിയില്‍ ഉള്ളവരാണ് യാത്രയാകുക. ഉച്ചയ്ക്ക് 11.15 നും വൈകിട്ട് 5.45 നും പുറപ്പെടുന്ന വിമാനങ്ങളിലാണ് ഗ്രീന്‍ കാറ്റഗറി തീര്‍ഥാടകര്‍ യാത്രയാകുക. ഗ്രീന്‍ കാറ്റഗറിക്ക് മസ്ജിദുല്‍ ഹറം പള്ളിയുടെ ഏറ്റവും അടുത്താണ് താമസ സൗകര്യം ഒരുക്കിയിരിക്കുന്നത്. ഈ വര്‍ഷം 1100 പേരാണ് കേരളത്തില്‍ നിന്ന് ഗ്രീന്‍ കാറ്റഗറിയില്‍ യാത്രയാകുക. ഗ്രീന്‍ കാറ്റഗറിയില്‍ ഈ വര്‍ഷം കൂടുതല്‍ പേര്‍ക്ക് അവസരം ലഭിച്ചിരുന്നുവെങ്കിലും പിന്നീട് സുരക്ഷാകാരണങ്ങളാല്‍ ഏതാനും പേരെ അസീസിയ കാറ്റഗറിയിലേക്ക് മാറ്റിയിരുന്നു.
സംസ്ഥാന ഹജ്ജ് കമ്മിറ്റി വഴി നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ നിന്ന് 900 ഹാജിമാര്‍ കൂടി ഇന്നലെ യാത്രയായി. 486 സ്ത്രീകളും 414 പുരുഷന്‍മാരുമാണ് ഇന്നലെ യാത്ര തിരിച്ചത്. ഇന്നലെ രാവിലെ 7 മണിക്ക് നടന്ന തീര്‍ഥാടകരുടെ സംഗമത്തില്‍ പാണക്കാട് മുനവ്വറലി ശിഹാബ് തങ്ങള്‍ പ്രാര്‍ഥനക്ക് നേതൃത്വം നല്‍കി. സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി അധ്യക്ഷനായിരുന്നു. ഓരോ ഹജ്ജ് വിമാനവും പുറപ്പെടുന്നതിന് നാല് മണിക്കൂര്‍ മുന്‍പാണ് എയര്‍ക്രാഫ്റ്റ് മെയിന്റെനന്‍സ് ഹാങ്കറിലെ പ്രധാന ഹാളില്‍ ഹാജിമാരുടെ സംഗമം നടക്കുന്നത്.