ടൂറിന്‍: സീരി എയില്‍ റൊണാള്‍ഡോ മികവില്‍ യുവന്റസ് കുതിപ്പ് തുടരുന്നു. ഒന്നിനെതിരേ രണ്ട് ഗോളുകള്‍ക്ക് സാംപ്‌ഡോറിയയെയാണ് യുവന്റസ് കീഴടക്കിയത്. രണ്ട് ഗോളുകള്‍ നേടി റൊണാള്‍ഡോ ടീമിന്റെ വിജയത്തില്‍ നിര്‍ണായക പങ്കുവഹിച്ചു. 2, 65 (പെനാല്‍ട്ടി) മിനുട്ടുകളിലായിരുന്നു റൊണോ വലചലിപ്പിച്ചത്. സാംപ്‌ഡോറിയക്ക് വേണ്ടി ഫാബിയോ ക്വാഗ്ലിയറെല്ല 33 ാംമിനുട്ടില്‍ പെനാല്‍ട്ടിയിലൂടെ ഒരു ഗോള്‍ മടക്കി. ഗോള്‍ നേടിയ റൊണാള്‍ഡോ ഇറ്റലിയില്‍ പുതുചരിത്രം കുറിച്ചു. ഒരു സീസണില്‍ ഏറ്റവും കൂടുതല്‍ ഗോള്‍ നേടിയ പോര്‍ച്ചുഗീസ് താരമെന്ന റൂയി ബാരോസിന്റെ റെക്കോര്‍ഡാണ് റൊണാള്‍ഡോ മറികടന്നത്.

സീരി എയില്‍ 19 മത്സരങ്ങളില്‍ നിന്ന് 14 ഗോളുകളാണ് റൊണാള്‍ഡോ നേടിയത്. നിലവില്‍ സീരി എയിലെ ടോപ് സ്‌കോററാണ് റൊണാള്‍ഡോ. സീസണില്‍ അപരാജിത കുതിപ്പ് തുടരുന്ന യുവന്റസ് 19 മത്സരങ്ങളില്‍ നിന്ന് 17 ജയവും രണ്ട് സമനിലയും ഉള്‍പ്പടെ 53 പോയിന്റുമായി പട്ടികയില്‍ ഒന്നാമതാണ്. ഇതുവരെ 38 ഗോളുകള്‍ അടിച്ച യുവന്റസ് 11 ഗോളുകള്‍ മാത്രമാണ് വഴങ്ങിയത്.

മറ്റു മത്സരങ്ങളില്‍ റോമ 2-0 ന് പാര്‍മയെയും ഇന്റര്‍ മിലാന്‍ 1-0 ന് എംപോളിയെയും അറ്റ്‌ലാന്റ 6-2 ന് സാസോളോയെയും പരാജയപ്പെടുത്തി.