പാലക്കാട്: വിലക്കു ലംഘിച്ച് ആര്‍.എസ്.എസ് ദേശീയ അധ്യക്ഷന്‍ മോഹന്‍ ഭാവഗത് സ്‌കൂളില്‍ ദേശീയപതാക ഉയര്‍ത്തിയ ചടങ്ങില്‍ ദേശീയ ഗാനത്തിനു പകരം വന്ദേമാതരം ചൊല്ലിയതായി പരാതി. ദേശീയ ഗാനമായ 'ജനഗണമന' ചൊല്ലാതെ ദേശീയഗീതമായ 'വന്ദേമാതരം' മാണ് ചൊല്ലിയത്.

ഇത് നാഷണല്‍ ഫഌഗ് കോഡിന്റെ ലംഘനമാണെന്നാണ് പരാതി. ദേശീയപതാക ഉയര്‍ത്തിയതിന് ശേഷം ദേശീയഗാനമാണ് ചൊല്ലേണ്ടത്.

ആര്‍.എസ്.എസ് ആഭിമുഖ്യമുളള മാനെജ്‌മെന്റിന്റെ നിയന്ത്രണത്തിലുളള പാലക്കാട് മുത്താംന്തറ കര്‍ണകിയമ്മന്‍ ഹയര്‍ സെക്കന്‍ഡറി സ്‌കൂളിലാണ് രാഷ്ട്രീയ നേതാവു മാത്രമായ മോഹന്‍ ഭാഗവത് പതാക ഉയര്‍ത്തിയത്. ജനപ്രതിനിധി പോലുമല്ലാത്തയാള്‍ പതാക ഉയര്‍ത്തരുതെന്ന ജില്ലാ ഭരണകൂടത്തിന്റെ വിലക്ക് മറികടന്നായിരുന്നു ഇത്.

സ്‌കൂള്‍ മാനെജ്‌മെന്റ് അംഗങ്ങളും പ്രിന്‍സിപ്പലും അടക്കമുളളവര്‍ ചടങ്ങിന് ഉണ്ടായിരുന്നു. രാത്രി തന്നെ ഇതുസംബന്ധിച്ച് കലക്ടര്‍ നോട്ടീസ് നല്‍കിയിരുന്നു. എന്നാല്‍ നിശ്ചയിച്ചുറിപ്പിച്ച പരിപാടി പെട്ടെന്നു മാറ്റാനാവില്ലെന്ന നിലപാടാണ് സ്‌കൂള്‍ അധികൃതര്‍ സ്വീകരിച്ചത്.

പ്രതിഷേധ സാധ്യത കണക്കിലെടുത്ത് സ്‌കൂള്‍ പരിസരത്ത് വന്‍ പൊലിസ് സന്നാഹം ഒരുക്കിയിരുന്നു. എന്നാല്‍ അനിഷ്ട സംഭവങ്ങളൊരുന്നുമുണ്ടായിട്ടില്ല. സംഭവത്തില്‍ പൊലിസ് നടപടിയുണ്ടാകുമെന്നാണ് സൂചന.